NBA India Game 2019 ticket an zuar dawn tan

07th August 2019, 10:08PM

India ramah a vawi khatna atan NBA game an khel dawn a, October thla tir lama khelh tur niin, ticket pawh an hralh chhuak dawn hnai tawh a ni.

The NBA India Game 2019 chu October 4 leh 5 khian Mumbai khawpuiah an khel dawn a, hetah hian Sacramento Kings leh Indiana Pacers te chu an inlan ang a. NBA team pahnihte hian ni hnih chhung hian pre-season game an khel dawn a ni.

NBA team pahnihte inkhel en theihna tur ticket lei duhte tan hming ziah lawkna hun an hawng tan a, August 11 thleng hian an hawng dawn a. August 13 chhun dar 12 atangin ticket hi an lei tan thei dawn niin NBA chuan an puang.

NBA India Managing Director Diane Gotua chuan, “India rama a vawi khatna atan NBA game khelh a ni ve dawn a. He ram chhungah hian nasa takin basketball chu a thang chho zel a, hemi lawmna ni pahfawm hian he hun hi buatsaih a ni dawn a ni,” a ti.

“Basketball ngainatu hi India ram chhungah an thahnem ve viau tawh a, kum tluanin basketball an buaipui ang a, NBA chu nasa lehzualin an vawrh thei tura ngaih a ni,” a ti bawk.

A sawi zelnaah, “NBA chuan kumin October thlaa India rama basketball ngainatute tan hun tha tak buatsaih theih ngei an duh a. Hetiang tur hian Sacramento Kings leh Indiana Pacers te chu an be fel vek tawh a ni,” a ti.

Sacramento Kings hi India rama piang, Mumbai khaw chhuak Vivek Ranadive kaihhruaina hnuaia awm niin, 2018 No. 2 overall draft pick Marvin Bagley III, 2017 No. 5 overall draft pick De’Aaron Fox leh 2016 No. 6 overall draft pick Buddy Hield (Bahamas) te an nei mek a ni.

Indiana Pacers hi Chairman leh CEO ni bawk, Herb Simon kaihhruaina hnuaiah an awm mek a. NBA All-Star Victor Oladipo, 2015 No. 11 overall draft pick Myles Turner leh 2017 Kia NBA Rookie of the Year Malcolm Brogdon te an nei a ni.

Copyright © inkhel.com 2024. All rights reserved.