22 Oct 2018 04:30

inkhel

NBA in Ingram, Rondo leh Paul te an hrem

Inrinni zana Los Angeles Lakers leh Houston Rockets inkhelh tuma buaina chhuak vangin NBA chuan Brandon Ingram, Rajon Rondo leh Chris Paul te chu inkhel thei rih lo turin an hrem.

NBA chuan buaina chhuak chungchang chu an chhui chiang a, buaina chhuah chhan bulpui nia an hriatte hremna thupek an chhuah zui a. Los Angeles Lakers forward Brandon Ingram chu game 4 chhung khel thei lo turin an hrem a, Lakers guard Rajon Rondo chu game 3 khel thei lo tura hremin, Houston Rockets guard Chris Paul chu game 2 khel thei lo tura hrem an ni a. Rondo hi Paul aiin game khatin an hrem hnem zawk a, hei hi a chhan chu a kut thawh hmasa ber a nih vang a ni.

“Ingram chu buaina tipunlun zawnga nasa taka a chet avang te, a bul tan nan Rockets guard James Harden a nem a, Chris Paul hnek tumin a kut a thawh bawk a, heng avang te hian na taka hrem a ni a, mawi lo takin game official lakah a che bawk a ni,” tiin NBA chuan thuchhuah an siam a.

“Rondo chu tharum a hman avang te, chil chhak khum vang te leh mi hnek vang tein hrem a ni a, Paul pawh Rondo laka mawi lo taka a chet dan avangin hrem a ni bawk,” tiin thuchhuahah hian an tarlang bawk.

NBA vice president of basketball operations Kiki VanDeWeghe chuan, “He thil thleng hi ngun takin kan chhui a, hetiang thil duhawm lo tak hi thleng tawh lo se kan duh hle a. Buainaa inhnamhnawihte kha na takin kan hrem dawn a, hetiang thil hi kan duh loh tak zet a ni tih lantirna atan hremna pawh kan tihnat phah hle a. Khawvela basketball league ropui berah hian insual hi kan pawm ngai lo a, engtikah mah kan pawm dawn lo,” a ti.

Lakers leh Rockets inkhelah hian fourth quarter-ah minute 4 leh second 13 chauh khelh tur a awm tawh a, Rockets chuan 109-108 in hma an hruai mek a, buaina hi a chhuak ta a ni.

NBA chuan he thil thleng an chhui chianna lamah hian court sir vela video camera atangin an bih chiang leh a. Video atanga a lan dan chuan Rondo chuan Staples Centre-ah hian Chris Paul-a hmaiah chil a chhak a, heta tang hian boruak chu a fuh lo chho ta a ni.

Chris Paul chuan Rajon Rondo hmaiah a kutzungtang chuan a va kawm a, hetah hian Rondo chuan Paul hi a hnek ta a. A piah daiha awm Ingram chu buaina chhuahna lamah hian a tlan phei a, Chris Paul leh PJ Tucker te awmna lamah chuan a va hnek phei fua a, mi erawh a hnek fuh mumal ta chiah lo thung.

VanDeWeghe chuan Igram khan mi chu hnek fuh se an hremna pawh tun aiin a na lehzual dawn niin a sawi a. Tu vak mah a hnek fuh ta lo kha a tan vanneihna a ni ta zawk a ni.