Chawlhni zan inkhelah DeMar DeRozan chuan point 19 a score a, Jonas Valanciunas chuan point 18 a score bakah rebound vawi 13 a la a, Toronto Raptors chuan Charlotte Hornets chu 103-98 in an hneh theih phah a. Raptors hi game 12 chhungin vawi 11 an chakna a ni ta.
Eastern Conference a hmahruaitu Raptors tan hian Serge Ibaka chuan point 17 a score a, Kyle Lowry pawhin point 14 a score ve bawk a, Toronto hian Air Canada Centre ah record an nei tha ta hle a, 26-5 niin, NBA khawvelah chuan mahni tual zawla record nei tha ber an ni a. Charlotte tan hian Kemba Walker chuan point 27 zet a score ve bawk.
Inkhel dangah Giannis Antetokounmpo chuan point 34 zet a score a, a zawna game 4 chhung chak tawh lo Milwaukee chuan Philadelphia chu 118-110 in an hneh theih phah a. Eric Bledsoe pawhin point 22 a score a, Jabari Parker chuan point 13 score vein, Eastern Conference ah Milwaukee chu pasarihnaah an awm mek a, paruknaah 76ers hi an awm bawk.
76ers tan Dario Saric chuan point 25 a score a, Joel Embiid chuan point 19 score in JJ Redick chuan point 17 a score ve bawk a ni.
Indiana chuan Washington chu 98-95 in an hneh a, Victor Oladipo chuan point 33 zet a score a, Bojan Bogdoanovic pawhin point 20 a score bawk a. Heti hian Eastern Conference ah Indiana hian Wizards hi lehpelin palina dinhmun an luah theih phah a.
Myles Turner pawhin point 12 score in rebound 13 a la a, Washington tan Bradley Beal chuan point 22 a score a, assist vawi 11 neiin, hei hi amah bikah assist a neih hnem ber tum a la ni.
New Orleans chu a zawnin game 8 chhung an chak ta a, Dallas chu 126-109 in an hneh a. He inkhelah hian Jrue Holiday chuan point 30 a score a, Nikola Mirotic pawhin point 24 a score ve bawk a. Anthony Davis pawhin point 23 a score bakah rebound 13 a la a, a point score hi a vai deuhthaw hian feet 5 chhung atanga a thun a ni.
Mavericks tan hian Dirk Nowitzki chuan point 23 a score a, field goal thun hnem zingah pariatna ni chhoin, 10,980 a score tling a, Elvin Hayes a lehpel ta chiah a ni.
Inkhel boruak tang takah Skal Labissiere chuan second 1.6 chauh a la awm tihin 3-pointer a score a, Sacramento chuan New York chu 102-99 in an hneh theih phah a. Bogdanovic chuan point 22 a score bakah assist 7 a nei a. Labissiere chuan point 14 a score bakah rebound 6 a la bawk a ni.
NBA result hrang hrang:
Atlanta Hawks 113-112 Phoenix Suns
Washington Wizards 95-98 Indiana Pacers
Toronto Raptors 103-98 Charlotte Hornets
Dallas Mavericks 109-126 New Orleans Pelicans
Milwaukee Bucks 118-110 Philadelphia 76ers
Los Angeles Clippers 123-120 Brooklyn Nets
Sacramento Kings 102-99 New York Knicks