Stephen Curry leh Kevin Durant te chuan thapui an thawh a, Houston Rockets lakah Golden State Warriors chu chakpuiin NBA Finals an khel dawn.

Western Conference finals Game 7-ah Warriors hian chuti takin bul an tan tha lem lo a, half time a thlenin point 11 in an la hnufual a. Third quarter-ah Golden State hian point an score hnem zawk a, point 18 an score hmangin hma an hruai ve tan a, a tawpah 101-92 a chakin NBA Finals hi an lut a ni.

Kevin Durant chuan point 34 a score a, Stephen Curry pawhin point 27 a score bawk a. Curry hian 3rd quarter chhunga Golden State point 33 score zinga point 14 chu a thun a, hemi quarter-ah hian Rockets chuan 3-point vawi 14 ngawt thun an tum a, a vaiin an hlah vek a ni.

Top seed Houston Rockets tan James Harden chuan point 32 a thun a, rebound 6 leh assist 6 a nei bawk a. Inhliam Chris Paul tel loa khel Rockets hian 1995 hnua a vawi khatna atan NBA Finals thlen leh tum viau mahse an thei ta lo a. Game 6 ang bawkin first half-ah chuan Rockets hi che tha mahse second half-ah an che a fuh thei ta meuh lo a, hei hi an tuar ta a ni.

Golden State Warriors hian Cleveland Cavaliers chu NBA Finals Game One-ah an lo mikhual ang a, anni hi NBA Finals-ah vawi 4 an inhmachhawn dawn ta chiah a ni.