LeBron James chuan player ropui a ni tih a lantir a, Cleveland Cavaliers chu chakpuiin, NBA Finals a luhpui.

Eastern Conference finals Game 7-ah Cleveland Cavaliers leh Boston Celtics te chu an inkhel a, LeBron James hian point 35 a score bakah rebound 15 lain assist 9 a nei bawk a, Cavaliers chuan Celtics chu 87-79 in an hneh a ni.

MVP vawi 4 lo ni tawh James hian a zawnin NBA Finals hi vawi 8 a lut ta a, Cleveland chuan Houston Rockets leh Golden State Warriors inkhela chak zawk zawk chu NBA Finals-ah hian an hmachhawn dawn a, Houston-ah anni pahnih hian Game 7 an khel dawn a ni.

Celtics tan Jayson Tatum chuan point 24 a score a, Al Horford pawhin point 17 a score bawk a, Marcus Morris chuan point 14 a score bakah rebound 12 a la a, 2010 hnua a vawi khatna atan Celtics chu NBA Finals luhpui an tum hle a, an beiseina hi a thamral ta a ni.

James hian 2011 atangin NBA Finals a la thleng ziah a, vawi 4 chu Miami ah a ni a, Cleveland ah vawi 4 a ni leh chiah bawk a. Tun tum hi a teammate te an that loh ber tum niin a ngaih theih a, Cavaliers all-star pakhat Kevin Love chu Game 6-ah a inhliam avangin a tel thei lo zui a, Jeff Green chuan a ai a awh a ni.

Jeff Green hian first round-a Indiana an hmachhawn tumin bul a tan a, hemi hnu hian bul tan a nei leh ta miah lo a, Celtics lakah hian point 19 a thun bakah rebound 8 a la a ni.

NBA Finals hi Nilaithawhtan hian Houston-ah emaw, Golden State-ah emaw an khel tan ang.