30 Sep 2020 05:48

inkhel

NBA Finals 2020: Los Angeles Lakers vs Miami Heat

Los Angeles Lakers leh Miami Heat te chuan naktuk zing dar 6:30 ah NBA Finals 2020 an khel dawn a, 2010 hnua Lakers-in Finals an luh leh hmasak ber niin, Heat pawhin 2014 hnua Finals an thlen leh theih hmasa ber a ni bawk.

Naktuk zinga NBA Finals khelh tur chungchang leh a behbawm chanchin langsar zual thenkhat han bih kual ila.

Miami Heat hi an champion a nih chuan NBA title vawi 4 an lakna a ni chiah dawn a, anni hi fifth seed zinga NBA Finals thleng thei hmasa ber an ni nghe nghe a ni.

Lakers hi an champion a nih chuan NBA title vawi 17 an la thei chiah ang a, title la hnem ber record Boston Celtics in an siam chu an nihrual thei chiah dawn a ni.

Season liam taah khan Miami leh Los Angeles te hi an conference awmnaah 10-na an ni ve ve a, a hma season-a playoff khel pha lo ve vein NBA Finals an khelh hmasak ber tum a ni ang.

Heat President Pat Riley chuan 1980 chho velah khan Los Angeles Lakers a enkawl thin laiin NBA title vawi 4 ngawt a lo lakpui tawh a. Miami head coach Erik Spoelstra chu head coach a nih hnua NBA Finals-a a inlan vawi 5-na a ni.

LeBron James chuan NBA Finals vawi 10 a khel tling dawn chiah a, a aia Finals khel hnem la awm chu Bill Russell (12) leh Sam Jones (11) te chiah an ni a, Kareem Abdul-Jabbar (10) nen an khelh zat hi a inang chiah a ni.

Tun tuma NBA Finals khel tur player 15 te chu NBA G League khel tawh an ni a, hengte hi Lakers player 6 leh Heat player 9 an ni.

Lakers player Anthony Davis chu playoff bika a average 29.6 points niin, a aia average point nei sang pahnih chiah an la awm a, Michael Jordan (33.4) leh Allen Iverson (29.7) te chiah tluk loh a nei.

Miami rookie Tyler Herro chu 2000 hnua piang zinga NBA Finals khel thei hmasa ber a ni ang.

Disney World chhunga hotel pathum chu player, coach, team basketball staff, media, broadcaster leh league kaihhnawih mi chi hrang hrangte thlenna atan an hmang.

Lakers leh Heat team te hi Coronado Springs a Gran Destino Tower ah hian kar 12 chu an awm tling ta a. 2019-20 season chhungin NBA team 22 te chu Florida khawpuiah hian an fuan khawm a ni.

Player, coach, referee, staff, venue operator, media leh network television mi leh sa phur kual turin lrithei 115 vel zet chu an hmang a. NBA mi leh sa hrang hrangte chu helai hmunah hian ni 100 chuang an awm tawh bawk.

NBA Finals khel tur zingah hian international player panga an awm a, Kyle Alexander (MIA; Canada), Kostas Antetokounmpo (LAL; Greece; BWB Africa 2015), Goran Dragic (MIA; Slovenia), Kelly Olynyk (MIA; Canada; BWB Americas 2009), Chris Silva (MIA; Gabon) te an ni.

NBA Playoff an khelh tirh atang khan ram 23 atangin media member 66 te chu NBA player Zoom media ah an tel thin a. NBA Finals hi ram 215 zet atangin an thlir dawn a, tawng chi hrang hrang 48 hmangin TV, computer, mobile phone leh tablet velah en theihin a awm ang.