NBA Defensive Player of the Year Giannis Antetokounmpo

26th August 2020, 09:08PM

Giannis Antetokounmpo chu a vawi khatna atan NBA Defensive Player of the Year atan an thlang.

Milwaukee Bucks star Giannis Antetokounmpo hian vote a hmu hnem fal hle a, infiamna lampang ziaktute leh broadcaster te chuan vote an thlak a, vote tla 100 ah hian Greek star hian vote 75 zet a hmu thei a ni.

Kum 25-a upa Giannis Antetokounmpo hi basketball player zingah chuan NBA MVP leh NBA Defensive Player of the Year dawng kawp thei zingah pangana chiah a ni a. 2018-19 MVP hi Orlando Magic nen Game 4 an khelh zawhah Milwaukee Bucks coach Mike Budenholzer chuan chawimawina a dawng tih hi a hrilh a ni.

Bucks chuan Orlando Magic chu 121-106 in an hneh a, he inkhelah hian Antetokounmpo chuan point 31 a score nghe nghe a. Vawi 4 an inkhelh tawhah Bucks hian 3-1 in hma an hruai a, Eastern Conference playoff first round-ah hian chak ngei tura ngaih an ni a, semi final luh an hnaih tawh hle.

Antetokounmpo chuan, “Inkhelh zawha coach te’n min be duh a nih hi chuan player zingah che fuh vak lo emaw, coach duh dan ang lo deuha che emaw an awm vang a ni duh hle a. Khatia min be duh a ni tih a rawn sawi khan ka hawi kual a, ka rilruah tu ber nge che fuh lo tih zawhna a rawn awm nghal a. Kei lah khan tih fuh loh em em ka neih ka hre si lo a, ka bangbo hle,” a ti.

“Chawimawina ka dawng a ni tih ka hriat khan ka lawm hle a, chutih rual chuan ka ngaihtuahnaah thil tam tak a rawn awm nghal bawk a. Theihtawp chhuah a beih tauh tauh that zia te ka ngaihtuah thar a, phak ang tawka thaa khelh zel tum hi chuan a tawpah lawmman chu kan hmu nge nge a ni tih hi ka rilruah a lian viau a ni,” a ti bawk.

A sawi zelnaah, “Hetiang dinhmuna ka din takah chuan chak hi a pawimawh em em a ni tih ka hriat thar theih phah a. Court chhunga kan luh tawh chuan chak theih ngei tumin tan kan la tur a ni a, theihtawp kan chhuah phawt chuan thil tha chu a tawpah kan hmu nge nge thin,” a ti.

Michael Jordan, Hakeen Olajuwon, David Robinson leh Kevin Garnett te chu basketball player zinga NBA MVP leh NBA Defensive Player of the Year chawimawina lo la kawp tawhte an ni a, Giannis Antetokounmpo chu an huangah hian a awm thar ve leh ta chiah a ni.

Copyright © inkhel.com 2024. All rights reserved.