NBA chuan 2018-19 season atan an dan hman lai thenkhat chu thlak danglam nual an tum a. Dan thlak danglamna tura ruahmanna an siamte hi September thlaah vote lain thutlukna an siam ang.

Board of governor te chuan offensive rebound hnua shot clock chu second 14 atanga second 24 a thlak an rawt a, clear-path foul rule tihdanglam te leh ‘hostile act’ tih chu huam zau zawka dah turin ruahmanna hi an siam a. September 20-21 hian meeting an nei ang a, hetah hian vote hmangin ngaihdan an la ang a, hmun thuma thena hmun hnihin ruahmanna thar hi an pawm a nih chuan dan hi an thlak danglam dawn a ni.

Ruahmanna an siam hian NBA chuan shot clock hi second 14 atanga second 24 a an thlak chuan shot attempt a tam phah an beisei a, game inhnehtawk deuhah phei chuan a tangkai lehzual dawn niin an ngai a. NBA hian FIBA in 2014 a dan an siam chu an zir chiang a, G League, WNBA leh NBA summer league vela an kalpui dan chu an zir chiang nasa hle.

Clear-path rule hman dan tur an ruahman dan chuan hetianga foul a awmin team te chu free throw vawi hnih an pek bakah foul thlenna atanga hnai berah sideline atangin ball an chang thei dawn a ni.

Backcourt atanga bul tan zel ngai chu NBA hian tihbo chhoh an duh vanga hetianga ruahmanna hi siam an nih thu an sawi a. Tin, hetianga kalphung an thlak danglam hian referee te tan pawh phurrit tam tak an chhawk zangkhai thei dawn niin an sawi bawk.

Nungchang mawi lo chungchangah pawh player leh player inkara thil thleng chauh ni tawh loin, player leh referee inkar emaw, player leh coach inkar emaw, player leh fan te inkar boruak emaw thlengin huamtir an tum a ni.