NBA Commissioner Adam Silver chuan Zirtawpniah khan July 31 atangin season chu chhunzawm leh theih a beisei thu a sawi.

Khawvel hmun hrang hranga coronavirus darh vangin infiamna chi hrang hrang chu tihtawp lailawk a ni hlawm a, NBA pawh March thla laihawl atang khan tihtawp lailawk a ni a. NBA player pakhat chu COVID-19 vei a ni tih finfiah a nih vanga chawl an ni a, North America lama infiamna tihtawp hmasak ber a ni.

Adam Silver chuan basketball league ropui ber NBA Board of Governors te hnenah July 31 atangin season tan leh theih a beisei thu hi a sawi a. Hetih rual hian NBA thupuangtu chuan thu chiang tak engmah a la awm loh thu a sawi chhuak.

Chanchinbu pakhat Athletic chuan NBA Commissioner Adam Silver thil sawi chungchang hi an tar lang a, hei bakah hian NBA thuneitute chuan inelna pali buatsaih an tum chungchang pawh an sawi niin an tar lang bawk a. NBA team 30 te chuan regular season chhungin game 72 an khel ang a, team sang zual 16 te chu play-off khel thei tura tlintir an rilruk niin an tar lang bawk.

Inelna kalphung thar an duan chungchangah pawh hian thutlukna fumfe chu a la awm chuang lo a. League chhunzawm chungchang pawh NBA Commissioner beisei dan chauh a ni a, khawi hmuna khelh tur nge tih te, entu an awm dawn leh dawn loh chungchang pawh engmah sawi lan a la awm chuang lo a ni.

Kar hmasaah khan NBA chuan season chhunzawm a nih theih nan The Walt Disney Company nen an inbiak thu an sawi chhuak a, July thla tawp lamah khian Florida khawpuia Disney World ah season chhunzawm ni se tiin rawtna an thlen a ni.

Tuna ruahmanna an siam danah chuan season an chhunzawm leh a nih pawhin hmun khatah chauh an inkhel ang a, an inkhelhna hmun tur atan hian ESPN Wide World of Sports Complex an thlang a ni.