​NBA: Bucks in final an lut; Warriors an chak bawk

09th May 2019, 05:05PM

NBA Playoffs semi-final khelh mek zel a ni a, Eastern Conference game 5-ah Milwaukee Bucks chuan Boston Celtics an hneha, Western Conference game 5-ah Golden State Warriors chuan Houston Rockets an hneh ve bawk.

Bucks chuan Celtics chu 116 – 91 in an hneha, series-ah 4-1 in Bucks chuan hma an hruai tawh avangin inlehthal theih a ni tawh lova, Bucks hian kum 2011 hnuah a vawi khat nan final an lut.

Warriors chuan 104 – 99 in Rockets an hneh ve bawka, Warriors hian 3-2 in series-ah hma an hriau meka, anni lam hi la inlehthal thei an ni.

Eastern Conference: Boston Celtics 91 – 116 Milwaukee Bucks

He inkhelah hian Bucks ‘star’ player Giannis Antetokounmpo a khel tha leh pek hle a, Giannis mai nilovin Bucks team pumpui khel tha in Celtics lamin an ti hleithei lo a ni ber.

Giannis hian point 20 a score a, rebound pariat la in assist pariat tho a nei bawk. Bucks hi game 1-ah chak lo mahse a zawnin game li an chak a, an chakna zat belhkawm hi point 65 lai a ni nghe nghe.

Final-ah Bucks hian Philadelphia 76ers emaw Toronto Raptors an hmachhawn dawn a, tunah hian Raptors lamin 3-2 in 76ers lakah hma an hruai mek a ni.

Western Conference: Houston Rockets 99 – 104 Golden State Warriors

He inkhelah hian Warriors tan Kevin Durant chuan point 22 score in, rebound panga a lak bakah assist pali a nei bawk a, mahse a inhliam avangin a chhuah hma a ngai. Warriors tan hian Klay Thompson pawh a langsar a, point 27 lai a score.

Rockets tan James Harden a langsar leh ber a tih theih a, point 31 lai score-in game 6-ah a team chakpui ngei a mamawh.

Stephen Curry a khel tha lo leh pek a, a shooting lam a fuh hleithei lo, point 25 a score. Durant a inhliam hi a nat dan tak hriat a la ni lova, game 6 a khel thei dawn em tih a la hriat loh a ni.

Copyright © inkhel.com 2024. All rights reserved.