San Antonio Spurs basketball star Manu Ginobili chu kum 16 zet mai NBA khawvela a lo tal tawh hnuah chawlh a tum thu a puang.

Hall of Famer hian a Twitter account-ah chawlh a tum tawh thu hi puangin, basketball chawlhsan chu hreh viau mahse a hun ve tawh thu a sawi a. NBA a luhchilh tirh atangin nuam a tih thu leh tun thlenga zinkawng ropui tak a zawh thei chu lawmawm a tih thu a sawi.

Manu Ginobili chuan, “Vawiinah hian rilru siam fel harsa ka ti hle a, mahse basketball chawlhsan hi a tul ve tawh si a, ka chawlh tur thu hi ka puang a. Zinkawng nuam em em mai ka zawh thei kha ka lawm a, ka suangtuah phak bak min thlenpui a ni,” a ti.

Kum 41-a upa Ginobili hi NBA champion vawi 4 a ni tawh a, NBA All-Star ah vawi hnih chu a tel a, Athens Olympic 2004 khan Argentina tan gold medal a la bawk a. 1999 khan Spurs second-round pick a ni a, game 1057 ah khelin a average chu 13.3 point leh 3.8 assist a ni.

Ginobili hian Spurs chu 2003, 2005, 2007 leh 2014 te khan NBA title a lakpui a. 2004 ah Argentina chu Olympic gold medal a lakpui bakah EuroLeague Finals Most Valuable Player atan 2001 han an thlang bawk a ni.

San Antonio-ah hian 2018-19 thleng contract nei mahse April thla khan a awm zel dan tur chu hriat thiam harsa a tih thu a lo sawi tawh a. A tha a za tawh lo viau a, hei vang hian chawlh mai hi tha zawkin a hre ta a ni.

“Tunah chuan ka thu mai mai ang a, ka hahchawl veng veng tawh mai dawn a. Chutiang chuan thla thum ve ka awm thei a nih chuan ngaiah ka neih chhoh zui mai ka ring a. Ngaihdan ka siam tawh chu ka keng tlang thin a, thu tiam tawh leh rilru ka siam tawhnaah chuan ka thutlukna ka thlak danglam ngai tawh lo a ni,” a ti.