NBA kaihhnawih thilah Mizo tlangval hmel hmuh tur a awm dawn a, Lalhnehpuia Chhakchhuak chu NBA Academy Games-a tel turin an thlang tel.

NBA Academy Games hi a vawi thumna a ni tawh dawn a, tun tum hi U.S. a an nghah hmasak ber niin, July 9 leh July 14 inkarah Atlanta-a Emory Sports Medicine Complex-ah an khel ang.

Games-ah hian khawvel ram hrang hranga NBA Academy a awm mekte chu an fuankhawm dawn a, Greater Noida-a NBA Academy bakah Australia, China, Mexico leh Senegal NBA Academy atang te pawhin an tel dawn a ni.

NBA Academy coach te chuan Games-ah hian player kal khawmte chu thil chi hrang hrang an tih tir ang a, inelna chi hrang hrang an neihpui dawn a. Player te chu eng anga tha nge an nih tih te an en kual ang a, heng bakah hian seminar pawimawh tak tak an neihpui bawk ang.

A hmain NBA Academy Games hi vawi hnih an lo nei tawh a, Australia rama nghah niin, Canberra khawpuia The NBA Global Academy-ah an nei thin a. Basketball Australia ho hmunpui, Australian Institute of Sport ho basketball training centre pui tak mai a ni a, helai hmun hi NBA ho hmunpui pakhata ngaih a ni.

India ram aiawh tur hian Manoj Sisodiya (MP), Amaan Sandhu (Punjab), Achintya Krishna (Karnataka), Lokendra Singh (Rajasthan), Lalhnehpuia Chhakchhuak (Mizoram), Harsh Dagar (Haryana), Pranav Prince (Kerala), Arvinder Singh (Punjab), Manjot Singh (Punjab), Kushal Singh (UP), Harshwardhan Tomar (MP), Vikrant (Haryana) leh Pritish Kokate (Maharashtra) te chu an thlang chhuak a ni.

Kum 16-a upa Lalhnehpuia Chhakchhuak hi guard niin, feet 5 leh inches 11 a sang a ni a, Mizo basketball player zingah chuan hmabak duhawm ber pawl a ni mek a ni.

National Basketball Association chuan khawvel ram hrang hranga basketball khel thinte chher hriamna atan NBA Academy hi an siam a. Heng academy hrang hrangah hian NBA-level coaching leh inenkawlna te an neihpui thin a ni.