NBA: A zawna game 17 chak tawh Rockets

08th March 2018, 05:03PM

Houston Rockets chu a zawnin game 17 chhung an chak ta a, Nilai zan khan Milwaukee Bucks chu 110-99 in an hneh a, James Harden chuan poin 26 zet a score a ni.

Rockets leh Bucks inkhelah hian Harden chu a langsar leh hle a, Bucks hian player naupang seng sawng deuh an chhawp chhuak a, beiseina nei sang viau mahse James Harden hmaah an duh angin an tal thei ta lo a. Harden hian first half ah point 21 teh meuh a score hman a, tumahin an dang hleithei lo.

Tun hnaiah Rockets hi an che tha chho hle a, an player te pawhin mahni inrintawkna an nei tha hle niin a hriat a. A hmatawng leh a hnung dawltu lam an inpawh tha em em a, an rilru a inman tih pawh an khelh dan atangin a hriat theih bawk a ni.

Eric Gordon pawh a che chhe lem lo hle a, point 18 chu a score ve a, Chris Paul chuan point 16 a score bakah assist 11 a nei bawk a. Paul hian a zawna vawi 17 chak theih hi vawi 2 a neihna a ni ta a, a hmain 2012-13 season khan Los Angeles Clippers ah heti zat hi a lo chak zawn tawh bawk.

First half ah point 8 chauh score in, a tirah che fuh lo viau mahse Giannis Antetokounmpo chuan a tawpah point 30 a score tling thei a, mahse Bucks chu a chakpui thei ta chuang lo a. Khris Middleton leh Eric Bledsoe te chuan point 33 inthawh tawm mahse awmzia a awm ta bik chuang lo.

Bucks hi game 7 an khelh hnuhnungah vawi 6 an chak lo ta a, Eastern Conference ah Miami Heat nen pariatna an ni dun mek a. Rockets hian Zirtawp zan khian Toronto Raptors an hmachhawn ang a, a zawna vawi 18 chak theih an tum hle.

Copyright © inkhel.com 2024. All rights reserved.