29 Oct 2018 07:23

inkhel

Naupang tanpui thintu tia hriat reng nih ka duh: Hamilton

Formula 1 world champion tharlam Lewis Hamilton chuan intlansiaknaa che tha thei deuh anga hriat reng nih ai chuan naupangte tanpui thintu tia hriat zui reng nih theih a duh thu a sawi.

Pathianniah Lewis Hamilton chuan a vawi 5-na atan world champion title a la a, Juan Manuel Fangio record a nihrual chiah a. Formula 1 title lak hnem lamah Michael Schumacher chiah tluk loh a la nei a, Schumacher hian title vawi 7 a la tawh a ni.

Title a lak hnuah Hamilton chuan nakin zelah intlansiak vanga hriat hlawh zui ai chuan naupang tanpui thin a nihna avanga hriat hlawh reng theih a duh zawk thu a sawi.

Kum 33-a upa Hamilton chuan, “Thil tih duh leh tih chak tam tak ka nei a, tunah tak hi chuan intlansiak hi ka khawvel bulpui a ni lo thei lo a. Nakin zelah pawh Formula 1 driver ka nihna hi miin min hriat rengna tur pawh a ni a. He infiamna zarah hian thil dang ti thei tur pawhin kawng a inhawn zau phah em em a, ka tan chuan duh thlan tur tam tak a awm theih phah a ni,” a ti a.

“Mi tana thil tha tih theih hi ka duhthusam a ni thin a, a dawngtu nih ngawr ngawr reng ka duh bik lo a. Chuvangin, mahni hmasial leh mi dang ngaihtuah ngai lo anga hriat hlawh ka ni ang tih ka hlau a, eng emaw avanga hriat reng hlawh theih a nih dawn chuan naupangte’n sikul tha taka an kal theihna tura tanpuitu anga min hriat reng theih ka duh a ni,” a ti bawk.

A sawi zelnaah, “Naupang tak takin hun harsa tak tak an paltlang nasa hle tih ka hria a, hetiang mite’n an harsatna thenkhat an sut tlang ve theihna turin ka theih ang tawka tanpui ve hi ka duh a. He khawvela ka chen chhunga mi dang tana tangkaina nei miah lo nih chu ka duh bik lo a ni,” a ti.

British driver Hamilton chuan, “Kan hun neih te hi tha taka hman tum hram hram ila, mi pawi sawi loin a tha zawngin hun hmang thei zel ila tih hi ka tum ber leh ka duhthusam a ni,” a ti a ni.