Lionel Messi chuan khelmual chhungah hming a chher nasa viau a, khelmual pawn lamah pawh a hmingtha viau zel bawk a. Tun hnaiah khan Barcelona khawpuiah naupang cancer enkawlna lungphum a phum.

Argentine superstar Lionel Messi chuan tun kar tir lam khan Barcelona khawpuia Pediatric Cancer Centre lungphum chu a phum a. He damdawi in hi Europe khawmualpuia naupang cancer enkawlna bikah chuan a changtlung ber ni thei turin ruahmanna an siam a, a sakna tur hian €30 million zet chu an ruahman a ni.

Messi chuan, “He hun duhawm taka ka tel thei hi ka lawm hle mai a, hetiang hmalakna ropui taka ka inhnamhnawih theih avang leh thil ruahman a taka a chang chho lai ka hmu thei tur hi ka lawm a ni,” a ti.

“Hna tan a nih theihna atana hma latu zawng zawng chungah lawmthu ka sawi duh a. He damdawi in hi peih a nih hunah naupang tam tak tibuaitu cancer hi hlawhtling taka do a nih theih ngei ka beisei a. He beiseina tihhlawhtlin a nih theihna atana ke pen thei zinga ka tel hi lawmawm ka ti hle,” a ti bawk.

Barcelona player chuan thu a sawi zawhah lungphum a phum zui a. Ruahman lawk dan chuan he damdawi in hi 2020 a hawn hman theih tura tih a ni a. Damdawi in din a nih theihna atan hian mi mal nuai khat chuang, company 150 chuang leh bul tantu donor 10 zetin pawisa leh thil chi hrang hrang an thawh khawm tawh a. February 2017 atang khan pawisa pawh €27.3 million zet chu an tuak tling tawh a, an mamawh tur zat nia ruahman €30 million chu an tlin teuh tawh hle.

Pediatric Cancer Centre hi pawisa awm ang angin an sa tan dawn niin Barcelona vice-president Jordi Cardoner chuan a sawi a. Sum mamawh belh ang chu Leo Messi Foundation chuan an ngaihtuah dawn niin a sawi bawk a ni.