02 Jun 2015 06:29

PC Lala

inkhel correspondent and photographer

​National Sub-Junior Girls Football Champion lawmna hun hman a ni.

June ni 1, 2015 Thawhtanni dar 1:00 PM khan National Sub-junior Girls Football Champion lawmna hun Mizoram Football Association buatsaihin Hotel Regency-ah neih a ni.

National Sub-junior Girls Football Champion 2014-15 Odisha a May ni 4 atanga ni 24, 2015 chhunga neihah Mizoram chuan an khingpui te hneh vekin an champion a, Coach hi Bethsy Lalhlimpuii niin, Manager Lalnunsanga a ni a, anni hian National Sub-junior Girls Football Championship-ah Mizoram chu a vawi khat nan an champion pui ta a ni.

Pu Lalruatsanga Tochhawng MFA Fin.Secretary kaihhruaina hnuaiah lawmpuina hun nuam tak hman a ni. Mizoram team maneger Lalnunsanga hnen atangin Report ngaihthlak a ni a, Team tel zawng zawng team 21 niin, Haryana nen final-ah an intum a, Mizoram hian 3-1 in hnehna an chang ta a ni. Mizoram hian goal thun hnem ber leh goal chhuah tlem ber record an siam nghe nghe. India team a awm turin Mizo player engemaw zat beisei an nih thu Mizoram manager hian a sawi a ni.

MFA honorary secretary Pu Lalnghinglova Hmar chuan,"Mizoram hian hmeichhe football-ah bungthar kan kai hi lawmawm ka ti a, Champion team thlawhnaa thlawh hawn tir ngei che u kan tum hle, hetih lai hian Nipui chawlh a nih chhoh avangin ticket lak tur a awm ta lova, kan theih tawp kan chhuah laiin hrehawm taka in lo hawng erawh a pawi kan ti hle.

"2015-16 chhung hian Hmeichhe Football lamah nasa takin hma kan la dawn a, National team thlenga invawrh chho turin District Level atanga hma lak a ni dawn a ni," tiin a sawi.

MLA Pi Vanlalawmpuii chuan Champion team te chu thilpek hlanin champion tura an thawhrimna a chhuan thu leh an kal zelna turah duhsakna a hlan thu a sawi. Player tinte hnenah Mizoram Football Association hian Rs. 5000 theuh lawmpuina a hlan a. Sports Minister Pu Zodintluanga chuan he lawmpuina hi hlanin, Mizoramin nasa taka Football-a hma kan sawn chu ropui a tih thu sawiin, Champion team ten an kal zelna tura passport an mamawh a nih chuan awlsam tak an neih theih dan tur an ngaihtuah zel tur thu a sawi tel bawk a ni.