Mixed Martial Arts (MMA) sport national event lian tak ‘AIMMAA Nationals’, Bangalore-ah Sept 30 aṭanga Oct ni 1 & 2, 2016-a khelh zawh takah MISMA tirha Mizo tlangval pali tel ve te an rawn hlawhtling hle. He event-ah hian State leh UT 26 an tel a ni. Overall champion chu Karnataka a ni a, Maharashtra pahnihna niin Assam pathumna a ni. Mizoram chu parukna kan ni ve.
National referee commission chairman leh international referee Samuel Lalrozama, Dawrpui chu Chief Referee a ni a, national referee thar chher turin training a pe bawk. Lalnunpuia Varte, Ramhlun North chu team Manager a ni. Mizo khelte chu:
1.Ngurlianzuala Sailo, 3rd Battalion MAP, Lily Veng, Aizawl (-93kgs) - Silver Medal.
2.David Chhangte, Ṭhuampui, Aizawl (-62 kgs) - -
3.Lalramdinthara, Thenzawl, Serchhip (-62kgs) - Bronze Medal.
4.PMS Dawngliana, Kawrtethawveng, Mamit/ Chaltlang Venglai, Aizawl (-57kgs) - Silver Medal.
September thla khan Samuela hnena training turin Bangalore an thleng a, FitPro company chuan an training te a lo sponsor a ni. Davida hian Maharashtra leh Karnataka-A te a hneh a, Karnataka-B lakah quarter finals-ah a vanduai ta a ni. Dawnga hian Maharashtra, Telangana, Assam leh Meghalaya te hnehin final-ah Karnataka point in a hneh zo ta lo a ni. Ani hi Lucy Chongthu-in a sponsor. Rama hian Maharashtra, UP leh Bengal hnehin semi final a lut a, UttarKhand lakah arm bar-in a chak lo ta a ni.
Ngura hian Mahrashtra leh Karnataka hnehin final a lut a, Tamil Nadu a hneh zo ta lo a ni. Ani hi Angels of God school-in a sponsor a ni. Karnataka MMA Association chuan Mizoram team te harsatna hriatpuiin pawisa faiin a lo sponsor ve bawk.
Mizo khelte hi stand up background aṭanga MMA-a lut vek an ni a, Mizoramah theih ang anga ground game (BJJ leh a dangte) an training hnuah Samuel-ate gym FitnessTime Bangalore-ah nasa takin an training leh a, FitPro company chuan an training te hi a sponsor bawk a ni. MMA hi khawvela game rorum leh țhang chak berte zing ami ni chho mek tia sawi a ni a; TV lama kan hmuh lar UFC-ah hian professional MMA rules hmana a ni. Pro-a lut thei tur hian amateur record neih a ngai a, tournament buatsaih a ni ṭhin a, chutiang chu India ramah pawh tih chhoh mek zel a ni.
He event-a ti țhate hian kan hma lam huna Sony ESPN nena thawk hova buatsaih tur SFL India League leh BodyPower international event neih turah chance țha tak an nei dawn a ni. National coach Alan chuan NE mite hi talent nei ṭha tak tak an ni a, an tan nasa taka hma lak an tum thu a sawi a, Mizote hi UFC thleng phak talent nei an nih thu a sawi bawk. AIMMAA hi india rama MMA association lian leh hlun ber, khawvel body lian IMMAF hnuaia din a ni. Mizoram team te hi tun kar tawpah Mizoram thleng tura beisei an ni.