Saina Nehwal chuan PV Sindhu chu Guwahati khawpuiah a hneh a, a zawnin Senior National Badminton Championship title a la.

Inrinnia Senior National Badminton Championship hmeichhe final khelhah Saina Nehwal leh PV Sindhu te chu an inkhel a, Saina chu a chak zawkah tangin, a title kawl lai chu a humhim thei a ni.

Kum 28-a upa Saina Nehwal leh PV Sindhu te inkhelah hian top seed Sindhu hian bul a tan tha zawk a, Saina chuan unforced errors a nei chho nghal a, hemi zarah hian Sindhu chuan a tirah point thum chu a hmu nghal a. Indonesia Open champion chuan ngai a awh chho a, a khingpui chu a pawtthla leh thei a ni.

Saina chuan a nawr na hle a, power smash a hmang nasa a, hei vang hian Sindhu pawh a duh angin a chet theih loh phah a. World No. 1 pawh lo ni tawh Saina chuan a tha a thlah duh lo hle a, an khelh rei deuh hnuah chuan point pawh a hmu sang fal tial tial bawk a ni.

Game khatna an khelh lai hian light thenkhat chu a rawn thim a, hei vang hian inkhel an chawlhsan lailawk a. Thuneitu lamin harsatna te an en fiah a, an chin fel hnuah inkhel chu an chhunzawm leh a, Saina chu 21-18 a chakin game khatna chu a la a ni.

Game hnihna an khel leh a, a hma ang bawkin Sindhu chuan bul a tan tha leh zawk a, mahse Saina chuan a pawtthla leh pek a. Commonwealth Games gold medallist chuan hma a hruai chho ta ngar ngar a, a tawpah 21-15 in Saina hi a chak zui a ni.

Saina hian Senior National Badminton Championship-ah a zawnin PV Sindhu hi vawi hnih a hnehna a nih bakah, an pahniha an inkhelhin a zawnin vawi thum a chak ta chiah bawk a ni.

Mipa lampangah Sourabh Verma chuan title pathum a la ta chiah a, a hmaa ding Lakshya Sen chu a hneh a. Sourabh hian harsa lem lo takin Asian junior champion, kum 17-a upa Lakshya Sen chu 21-18, 21-13 in a hneh a ni.

Mipa doubles-ah second seeded pair Pranaav Jerry Chopra leh Chirag Shetty te chuan top seeded pair Arjun MR leh Shlok Ramchandran te chu minute 33 chhungin 21-13, 22-20 in an hneh a ni.