07 Nov 2019 05:00

inkhel

Nate Diaz a chawl tawh dawn?

Nate Diaz chuan UFC 244 ah Jorge Masvidal a hneh lo a, hemi hnuah hian a Instagram account lamah chuan chawlh lampang a hnaih nia ngaih theihin thil a tarlang a ni.

UFC 244 neih zawh takah khan welterweight fighter rothap em em mai pahnih an insual a, Nate Diaz leh Jorge Masvidal te chuan main event an chang a ni.

Diaz hian UFC 241 ah Anthony Pettis a hneh a, second 5 chhung leka Ben Askren hneh theitu Jorge Masvidal chu a cho zui nghal a. UFC chuan anni pahnih hi insual turin ruahmanna an siam zui a, a chak zawk zawk chu a vawi khatna atan BMF champion ni turin ruahmanna an siam bawk a ni.

Masvidal leh Diaz te chu UFC 244 ah an insual ta ngei a, a tir atangin Masvidal chu a chungnung zawk a ni nghal a, nawr pawh a nawr na zawk daih bawk a. Round 3 tawpah chuan Diaz-a mit ko dinglam kak chu a nasat deuh em avangin doctor chuan insual zui tawh lo turin a ti a, referee chuan insual chu a titawp zui a, Masvidal chu chak zawkah an puang a, BMF title chu a la zui a ni.

Hetiang thil a thlen hnuah hian Nate Diaz chuan ama Instagram account lamah Jorge Masvidal nen insual nawn leh lampang chu a ngaihven lo niin a sawi a, chutiang lampang buaipui loin zin kual a tum thu a sawi bawk a. Hei bakah hian insual lampang chu bansan a tum niin thu a dah tel bawk a, insual zui hi a tum tawh lo niin a ngaih theih phah a ni.

A mit ko kak nasa vanga an insual an tihtawp hnuah mi tam tak chuan Nate Diaz leh Jorge Masvidal te chu insual nawn leh tura an duh thu an sawi a, mi tam tak beisei dan pawh a ni bawk a. An insual tihtawp vang ni loa pangngai taka inhneh thei tura insual nawn tura duhtu an awm nual a ni.

Tun dinhmunah chuan octagon chhungah Nate Diaz hi a kir duh tawh loh mai te pawh a rinawm thei hial a, UFC huangah a hmel hmuh zui tur a awm tawh lo ve thei tlat a ni.