08 Nov 2018 04:56

inkhel

Nasukawa nen kan inbei dawn lo: Mayweather

Kumhlui thlah niah Floyd Mayweather chuan Japanese kickboxer Tenshin Nasukawa a hmachhawn dawn tia an sawi hluai hnuah Mayweather chuan hei hi a taka a thlen dawn loh thu sawiin, hetiang tur hian a remtihna an lak loh thu a sawi.

Japan ramah press conference an nei a, hetah hian Floyd Mayweather leh Tenshin Nasukawa te hian thla te pawh an la nasa hle a. Heti chung hian Mayweather chuan December 31 a inbei tur anga ruahmanna an neih chu engmah a hriatpui loh thu sawiin, a remtihna engmah an lak loh thu a sawi bawk a ni.

Tokyo khawpui a tlawh hian Rizen Fighting Federation in fighter an thlan chhuah chu round 3 chhung hmachhawn tura an tih thu sawiin, a hmachhawn tur hian Japanese kickboxer Tenshin Nasukawa an thlan thu an sawi a, Floyd chuan hei hi a lo pawm thu sawiin, hetianga a pawm chhan chu official fight ni loa ennawm ang chauh a nih dawn vang niin a sawi.

Floyd Mayweather chuan thil an lo puanzar vek tawh hnua a thulhtir leh dawn tak avangin ngaihdam a dil a, thawm neih chhunzawm loh tha bera a hriat thu a sawi a ni.

“Boxer chawl tawh ka ni a, tun dinhmunah chuan sum thahnem tak ka la lut mek zel a, khawvel hmun hrang hrang atangin hlawh neuh neuh hi ka nei ve reng a. Eng thilah emaw ka inlan manah te, thu ka sawi vang te leh thil dang dang vangin pawisa hi chu ka la lut ve reng a ni,” tiin Mayweather chuan a sawi.

“Khawvel hmun hrang hrang atanga rawn kal khawmte an zahawm hle mai a, mahse kan inbei dawn nia an sawi hi a thleng dawn lo a, beiseina lo nei sang hman zawng zawngte chungah ngaihdam ka dil e,” a ti.

Kum 41-a upa Mayweather hian Tokyo khawpuia press conference an neih tum khan kum 20-a upa Tenshin Nasukawa nen inbei tur angin thil a sawi nual a. Mipuiin an beisei ang ngeiin an inhmachhawn dawn tih sawiin, boxing nge kickboxing ni dawn tih chu nakina a chian tur thu thlengin a sawi a ni.

“Boxing ni lo deuh, thil danglam tih ve chhin ka chak a, ka thiamna hi US pawn lama pho chhuah ka duh bawk a, he fight hi a danglam dawn khawp mai,” tiin Mayweather chuan a sawi.

“Vawi 50 ka lo inhnek tawhte kha US chhungah vek a ni a, ka thiamna hi US pawn lamah ka la entir miah lo a, khawvel hmun hrang hranga ka thiamna leh theihna te hi pho chhuah theih ka duh a ni,” a ti bawk.

A sawi zelnaah, “December 31 ah chuan ennawm thlir manhla tak entir che u ka duh a, tunah chuan RIZIN nen kan inzawm chauh a, nakinah chuan a aia lian leh huap zau te ka la tinzawn theih ka beisei,” a ti.

Floyd chuan, “Kan inbeih dan tur te, weight class te leh thil pawimawh dangte chu nakinah kan la sawi chiang dawn chauh a, hun rei vak loah chuan a kimchangin kan puang thei turah ka ngai,” a ti a ni.

Tenshin Nasukawa hi RIZIN championship velah a tel thin a, MMA leh kickboxing inelna velah a lo tel tawh thin a. MMA bikah vawi 4 a tel tawh a, a la chak vek a. Kickboxing lamah pawh a duai lo hle a, vawi 27 a khelh tawhah a la chak vek a, heng zinga 21 te hi a knock-out hlawm a ni.