07 Dec 2018 04:44

inkhel

Nasukawa nen ennawm kan chhuah dawn: Mayweather

Floyd Mayweather chuan December 31 a Japanese kickboxer Tenshin Nasukawa nen an inhmachhawn tur chu nasa taka inbeihna lampang ni loin, ennawm atan chauh a nih thu a sawi.

Kumhlui thlah ni hian Japan rama Saitama khuaa Saitama Prefecture Super Arena ah Mayweather leh Nasukawa te chu minute 9 chhung an inbei dawn a. Anni pahnih inhmachhawn result chu eng ang pawh ni se an record-ah ziah tel a ni dawn lo a ni.

Mayweather chuan Nasukawa nen an inhmachhawn hunah chuan judge pawh an awm dawn lo nia sawiin, mi tana ennawm tur chauh a nih thu a sawi a. Minute 9 chhung chu mi mit titlai turin an che dawn niin a sawi a, boxing dan pangngai an hmang dawn niin a sawi bawk.

Round thum an inhnek ang a, round khat hi minute 3 zela rei a ni dawn a, 67kg (147 pound) huangah a ni dawn a, Nasukawa chuan Mayweather hmachhawn chu a chak tawh thu a sawi nasa hle.

Las Vegas khawpuiah Tenshin Nasukawa chuan, “Japanese fighter zingah ring chhunga Floyd Mayweather hmachhawn thei an la awm lo a, kei hi a hmasa ber ka ni dawn a, boruak neih viau ka tum dawn a ni,” a ti.

Kum 20-a upa Nasukawa (27-0, 21 KOs) chuan, “Kan inbei turah hian fighter te bakah Japan ram pumpui mai ni lo, khawvel pumpui hi chawk tho thei ila ka ti a. Boruak sang tak hnuaiah inhmachhawn ngei hi ka duh a ni,” a ti bawk.