Rasmus Hojlund chungchangah Napoli leh Manchester United te chuan inremna an nei ta a, Napoli hian loan-in an hawh ang a, nakkum nipui bazarah Napoli hian €44million (£38m; $51.4m)-in an lei dawn a ni.

Kum 22 mi Hojlund hian Old Trafford-a cham chhunzawm zel la duh mah se, hetia Napoli-in an rawn sawm chuan, pan a remti a, United-ah hmun a chang dawn lo tih a inhre chiang a, Amorim chuan Hojlund hi tun season game thum an khelh tawhah a la chhawr lo a ni.

Tun thla tir khan Manchester United chuan RB Leipzig atangin €76.5m lai sengin Benjamin Sesko an lei a, hei vang hian United chuan Hojlund hi thehchhuah an duh ta a ni.

Hojlund hi Atalanta, RB Leipzig, Newcastle United leh Napoli te chuan an ngaihven a, Napoli nen inremna an nei thei ta a ni.

Napoli hian striker an dap kual nasa hle a, an striker Romelu Lukaku chu malpui tha hliam avangin a chawl mek a ni.

Season liamta khan United tan competition hrang hrangah Hojlund hian game 52 a khel a, goal 10 chiah a khung a, Premier League-ah chuan goal 4 chiah a khung a ni.

Hojlund hian Old Trafford-a cham chhunzawm zel a, inkhelhna hmun chang thei tura beih pawh a tum hle. Chutih laiin a lo tlangnel tawhna Italy lama kir leh theihna hun remchang a hmu a, hei hi a umzui ta a ni.