Chelsea, Real Madrid leh PSG te nena sawi zawm ni mek Victor Osimhen chu Napoli lamin hralh an phal ta nia report a ni a, a man tur pawh hi £112m vel a ni dawn a ni.

Napoli president Aurelio De Laurentiis chuan an striker Osimhen chu tun season tawp ruala a chhuah tur thu a sawi niin The Sun-in a tarlang. 

Kum 30 lai Serie A title an lak tawh loh hnuah Osimhen leh a hoten Napoli chu trophy an chawipui a nih kha. Nikum nipui bazar inhawn lai khan Osimhen hian Napoli a chhuahsan dawn niin thu a thang nasa.

Mahse kum 25 mi hian thla hmasa khan Naples-ah contract thar a ziak a, hei hian a man pawh a tihto phah dawn ta a ni.

Contract thar ziak mah se Osimhen hi Napoli-ah a nghet tihna a ni chuang lo a, a contract tharah khan release clause £112m lai ziah tel a nih thu The Sun chuan a tarlang.

Tun season tawp hunah Napoli hi an Osimhen hi an hralh a nih chuan, a man a to dawn khawp mai. An president Aurelio De Laurentiis pawhin a chhuak a nih chuan Real Madrid emaw English club lian eng emaw ber a pan a rin thu a sawi tel bawk.

Osimhen hi Chelsea, Real Madrid leh PSG te chuan an ngaihvan mek reng a. Chelsea hian goal khung khawl an mamawh a, Real Madrid pawhin Centre foward an mamawh bawk. Real hian Mbappe an la thei a nih erawh chuan Osimhen hi an ngaihtuah tawh loh a rinawm.