US Open 2018 hmeichhe singles final-a Grand Slam title vawi 23 ngawt lo la tawh Serena Williams hnehtu Japanese tleirawl Naomi Osaka chuan a ngaihsan em em hnehin Grand Slam title pakhat a la ve ta chiah a ni.

Naomi Osaka hi Japanese zingah chuan Grand Slam title la thei hmasa ber niin, US leh Japan ramah te khua leh tui nihna a nei ve ve a. A pa Haitian niin, a nu chu Japanese a ni a, Japan rama piang ni mahse kum thum a nihin America ramah an pem a, tunah hian Florida-ah a khawsa mek a ni.

Grand Slam bikah chuan a hmaa a chet that ber chu kumin Australian Open kha a ni a, fourth round a paltlang thei ta lo a. Naktukah hian WTA ranking thar berah World No. 7 a ni thei dawn a, tennis khawvel a luhchilh hnua a thlen san ber tum a la ni ang.

Kumin kum tirah khan Osaka hi USA a Indian Wells Open-ah pawh a lo champion tawh a, Women’s Tennis Association title a lak hmasak ber a ni tawh bawk a, kuminah a che fuh chho hle a. Indian Wells-ah hian Kasatkina chu 6-3, 6-2 in a hneh a ni.

Osaka hian ITF final vawi 4 chu a lut ve tawh a, mahse final a luh tawhah hian a la tlawm vek thung a. Kumin tih loh, US Open hnuhnung pahnihah a la chet that ber chu third round a thleng thei a, a aia sang a la thleng chho thei lo a, kuminah erawh a lerah a ding ta a ni.

Kum 20-a upa Naomi Osaka hian bul a tan chho dawn chauh a tih theih a, a hmabak hi a eng viauin a ngaih theih a. A hlawhtlinna belhchhah zel tur chuan tun laia boruak nei lian Sloane Stephens te, Simona Halep, Garbine Muguruza, Angelique Kerber leh Caroline Wozniacki te a khin chhoh a ngai dawn a ni.