Naktukah Rafael Nadal te an innei dawn

19th October 2019, 01:10AM

Rafael Nadal leh a kawppui Xisca Perello te chu naktukah hian Majorca-ah an inkutsuih ve dawn ta.

Tennis star Rafael Nadal leh Xisca Perello te hi La Fortaleza-ah an innei dawn a, helai hmun hi 2016 BBC spy thriller The Night Manager tih film, Hugh Laurie channa an siamna hmun kha a ni.

Inneihnaah hian mi an sawm hrawl hle a, hun rei tak Spain lalpa ni thei Juan Carlos I pawh an sawm a, a tel ve dawn a nih chuan a hmunah hian helicopter hmanga a kal an ring a. Mi 350 an sawm zingah tennis player chawl tawh, World No. 1 hlui Carlos Moya pawh a tel beisei a ni.

Majorcan chef lar Macarena de Castro chu inneihnaa ei leh in buaipui turin an ruai a. Puithiam Tomeu Catala chuan Nadal te hi a inneihtir dawn a, kum 14 zet an lo inkawp tawh hnuah nupa an ni ve dawn ta a ni.

Rafael Nadal leh Xisca Perello (a hming tak chu Maria Francisca Perello) te hi kum 14 kalta atanga la inkawp ngar ngar kha an ni a. Xisca hian a hmaa insurance lama a hna chelh thin chu bansanin, kum 10 kaltaa Nadal-a din, Rafa Nadal Foundation-ah project director a ni.

Nikumah khan Nadal chuan, “Chhungkaw din hi ka duhthusam a ni a. Naupang ka ngaina a, fa neih a, an duh anga an nun an hman chhoh theih hi ka duhthusam a ni,” tiin a lo sawi a, a duhthusam chu a hnaih sawt tawh dawn hle a ni.

Kumin May thlaah khan Nadal leh Xisca te hi Rome khawpuiah an lo inhual tawh a. An inneihna hmun tur hi Gareth Bale te inneihna hmun tho niin, Real Madrid star Bale leh a kawppui Emma Rhys-Jones te chu kumin June thlaah khan an lo innei ve bawk a ni.

Copyright © inkhel.com 2024. All rights reserved.