05 Jul 2019 01:17

bakteaJr.

Mizo tlangval

​“Nadal vuak per kha ka tum a ni” – Kyrgios

Wimbledon khelh mekah Australian mi Nick Kyrgios leh world no.2 Rafael Nadal-te chu second round-ah an inhmachhawn a, inkhel hmuhnawm takah Nadal hi 6-3, 3-6, 7-6 (7-5), 7-6 (7-3) in a chaka third round khel turin a in vaw kai.

He inkhelah hian Kyrgios hian Nadal-a lakah underarm serve vawi hnih ngawt a nei a, tum khat chu Nadal hi ball a vuak per lui ni awm takin ball a hlap bawk. Nadal leh Kyrgios-te hi vawi 7 an intum tawh a, head-to-head ah Nadal hian 4-3 in hma a hruai ta chiah a ni.

Nadal a vuak per hian Nadal chuan a racquet-in a lo in dang hmana, Kyrgios hian thupha eng mah a chawi zui lo bawk. Inkhel zawhah Kyrgios chu thupha a chawi loh chungchang zawh niin Australian player chuan, “Engvangin nge thupha ka chawi ang? Point khat ka hlawh chhuak alawm. A mah kha lawm vuak per ka tum hrim hrim.

“Nadal hian Grand Slam a la teuh tawh a, a bank account-ah pawh pawisa a ngah viau ang, ball-in vawi khat a awma a fuhte chu a tan eng mah a ni lovang,” a ti sam et.

Kyrgios hi mize dangdai ve tak nei a ni a, Nadal leh Novak Djokovic-te chu hnehsawh thinin, Nadal nena an inhmachhawn tur pawh hi a la lap angreng viau niin a lang. Nadal nen an intum hma zan hian ‘pub-ah’ te kalin nula-te nen zu an in thu te a sawi nghe nghe. Nadal nena an inkhelh zawh hian Kyrgios hian umpire a sawisel zuia, match a enkawl dan chu a that lo hle niin a sawi bawk a ni.