Nadal nen hian Messi leh Ronaldo ang kan ni: Federer

02nd July 2018, 10:07PM

Roger Federer chuan a elpui ber Rafael Nadal nen chuan tennis khawvela Lionel Messi leh Cristiano Ronaldo an nih thu a sawi.

Wimbledon khelh tanah Roger Federer chuan vawi 9 champion nih theih ngei a tum dawn a, hemi kawng zawh tur hian a hmasa berah Serbian star, world no. 57 Dusan Lajovic chu Centre Court-ah a hmachhawn dawn a. Kum 10 kaltaa Wimbledon final-a Rafael Nadal a hneh loh champhaah Nadal nen chuan tennis huanga Messi leh Ronaldo an nih thu hi a sawi a ni.

Swiss star Roger Federer hi Wimbledon-ah vawi 20 a tel tling ta chiah a, nikum khan a champion a, kuminah a title hi humhim ngei a tum dawn a. Spaniard Nadal chu Wimbledon final-ah vawi hnih a lo hneh tawh a, 2008 final-ah an intum leh a, darkar 5 dawn an inkhel a, set nga khelin Nadal hi a chak a ni.

Mi maktaduai chuang zetin hemi kuma final hi a hmunah leh TV atangin an en a, Wimbledon bikah chuan Rafael Nadal a champion hmasak ber tum a ni nghe nghe a. Hemi tum atang hian khawvelin Nadal leh Federer te chu an dah chungnung chho tan a, an pahnih inkara boruak awm chhoh tanna pawh niin an sawi.

Federer chuan, “Messi leh Ronaldo te hi hun rei tak chu an lo iner chho ngar ngar tawh a, chutiang deuh chiah chu kei leh Rafa pawh hi kan ni,” tiin a sawi.

“Lionel Messi leh Cristiano Ronaldo te hi an inang lo em em a, mahse kawng tam takah inanna chu an nei tho a. Keini pawh inang lo viau mah ila, kawng thenkhatah chuan kan inang ve leh nual tho a. Sawi pawlh loh theih loh, sawi pawlh hleihtheih loh kan ni ber e,” a ti bawk.

Football khawvelah Messi leh Ronaldo te chuan chawimawina sang an indawn chhawk a ni deuh ber rih a, chutiang deuh bawk chuan Grand Slam title hnuhnung paruk chu Federer leh Nadal te hian an insem ve bawk a, heng Grand Slam title hnuhnung paruk hi pathum ve vein an insem a ni.

Rafael Nadal hian major title 20 ngawt mai a la tawh a, Nadal hian title lian hi 17 a la ve tawh bawk a, a hnuhnung ber chu French Open kha a ni.

Kuminah Nadal chu Wimbledon-ah world no. 1 ni chungin a inlan dawn a, pahnihna chu champion lai Roger Federer hi a ni a. Russia rama World Cup khelh mekah khawvela footballer ropui ber pahnih Messi leh Ronaldo te chu an zinkawng a tawp ta a, final an thleng pha lo ve ve a. Federer leh Nadal te hi an chak zel a nih chuan kum 10 kalta ang bawkin an pahnih hian final-ah an inhmachhawn thei ang.

Copyright © inkhel.com 2024. All rights reserved.