Nadal leh Federer an inpan hnai zel

10th July 2018, 12:07AM

Wimbledon khelh mekah top seed pahnih Roger Federer leh Rafael Nadal te chu an inpan hnai hret hret zel a, anni pahnih hi an chak chhoh zel chuan final-ah an intum thei dawn a ni.

Roger Federer (1) leh Rafael Nadal (2) mai bakah Juan Martin del Potro (5), Kevin Anderson (8) leh John Isner (9) te chuan an khingpui an la hneh chho zel a, fourth round an lut tawh hlawm a. Kum 36-a upa Federer leh kum 32-a upa Nadal te chu 2008 final thlen nawntir leh tumin theihtawp chhuahin an insangmar chho mek.

World No. 1 Nadal hian Czech star Jiri Vesely chu fourth round-ah a hmachhawn dawn a, vawi 11 zet mai French Open title la tawh hian final-a Federer a hmachhawn theih chungchang sawiin, “Final ka lut te a nih chuan Roger aia huphurhawm lo hmachhawn thei ila ka duh a. Amah nen kher final khelh duh tur khawpin ka mawl lo a. Final ka lut thei a nih ngat chuan chanchin duhawm tak a ni ang a, final-ah meuh chuan tu pawh hmachhawn ila, an khirh vek dawn tih a chiang,” a ti.

Nadal hi final lut thei tur chuan a kawng a khirh ve viau dawn a, quarter final-ah Argentine Juan Martin del Potro a hmachhawn thei dawn a, a la chak zel a nih chuan semi final-ah Serb mi Novak Djokovic a hmachhawn leh a ngai dawn a ni.

Kum 20 kaltaa Wimbledon junior title lo la tawh, Roger Federer chuan a vawi 9-na atan Wimbledon title lak leh ngei a tum dawn a. Seeded player ho an tlak deuh nual hi chuan a zamawm duh thu a sawi a, last 16-ah Frenchman Adrian Mannarino nen an inkhel dawn a, Nadal ai chuan final lut thei turin a kalkawng a khirh dawn lo zawk a ni.

Copyright © inkhel.com 2024. All rights reserved.