Kumin Wimbledon semi final-ah lo hneh tawh mahse Novak Djokovic chuan Rafael Nadal chu ATP World Ranking-a pakhatna nih phu ber a nih thu a sawi.

Serbian star Djokovic hian Wimbledon semi final-ah Spaniard Nadal chu hneh mahse khawvela mipa tennis player zingah a la chungnung ber niin a sawi a. French Open leh US Open title kawl mektu Nadal hi ranking thar berah No. 1 a ni a, Wimbledon champion Djokovic pawh a hma aia hmun 11 zetin a kaisang a, No. 10 a ni.

Djokovic tan chuan Rafael Nadal hneh theih chu thil ropui tak a tih loh theih loh a. Eng eng emaw harsatna hrang hrangin a tlakbuak chho a, hei vang hian Djokovic hi a tlahniam hman hle a. Harsatna hrang hrang a tawh bakah a kiu hliam vangin 2016 French Open hnuah Grand Slam final a lut leh ta lo vang vang a, kumin Wimbledon kha a rawn inlar chhuah lehna chiah a ni.

“Nadal kha ka hneh lo teuh khawp mai a. Khawvelah chuan a thiam ber a ni chiang a, khawvela tennis player zingah Nadal tluka thiam hi an awm lo a, kuminah pawh a langsar ber a nih chhoh zel ka ring a, clay bikah phei chuan khumtu an awm hauh lo ang,” tiin Djokovic hian a sawi.

Novak Djokovic leh Rafael Nadal te hi tunlai tennis khawvelah chuan boruak nei lian ve berte zinga mi an ni a. An pahnih hian vawi 52 zet an lo inhmachhawn tawh a, Grand Slam bikah chuan vawi 14 an lo inkhel tawh a. Heng an inkhelh tawh zawng zawngah hian Novak Djokovic hi a la chungnung zawk a, vawi 27 a chak tawh a, Nadal hi vawi 25 a chak ve tawh bawk.

Wimbledon semi final kha an pahniha set nga an khelh vawi thumna niin, semi final bik kha ni hnih chhung an khel a, an inkhelh hun chhung chu darkar 5 leh minute 15 zet a ni.