Swedish tennis player hlui, Grand Slam singles title pasarih lo la tawh Mats Wilander chuan Rafael Nadal chu French Open-ah hneh theih loh tluk a nih thu a sawi.

French Open khelh mekah champion lai Nadal chuan quarter-final ah Diego Schwartzman chu 6-3, 4-6, 6-4, 6-0 a hnehin, semi-final an lut fel leh der tawha, Schwartzman laka set khat a hloh hi, Nadal-a’n a zawna vawi 36 zet French Open-a set a lak hnua a set hloh vawi khatna a ni.

Nadal hian French Open title hi vawi 13 ngawt a la tawha, hei hi record ding lai a ni a, kuminah a vawi 14 nan a la leh lovang tih a sawi theih lova, a kaltluang hle.

Nadal hian Grand Slam title 20 ngawt a la tawha, men’s singles-ah Roger Federer nen Grand Slam title la hnem ber ni mekin, Nadal hi French Open khelh mekah a champion a nih chuan, mipa zinga Grand Slam title la hnem ber a ni dawn.

World no.1 pawh lo ni tawhin, French Open-a vawi thum lo champion tawh Wilander chuan Nadal-a chungchang sawiin, “Schwartzman kha a khel tha in, Rafa kha a chhaih buai hle a, a hmuhnawm hle. Third set zawh thleng khan Schwartzman a khel tha em em a, mahse Rafa kha a ni aiin step khatin a rawn sanga, a umpha ve ta lo a ni ber. Diego Schwartzman a khel tha viaua, mahse Rafa khan hneh theih a ni lo tih a lan tir a ni ber,” a ti.