Rafael Nadal chuan Madrid Open-ah a khingpui Diego Schwartzman a hneh a, quarter final lutin, kum 34 zet John McEnroe record lo chelh tawh chu a rawn khum.

World No. 1 Nadal hi a zawnin clay court-ah vawi 50 a chak tling ta chiah a, 1984 a John McEnroe a zawna vawi 49 chak record chu a khum ta chiah a. Hemi kum hian McEnroe pawh hi Madrid Open-ah hian a champion a, Rafael Nadal hian champion ve turin Austrian star Dominic Thiem chu quarter final-ah hian a hmachhawn ang.

Nadal hian Diego Schwartzman chu awlsam deuhin 6-3, 6-4 in a hneh a, hetianga a chak tluan em em chhan ni thei pakhat chu tawh khirh deuh tur a hmachhawn tlem a, Roger Federer, Novak Djokovic leh Andy Murray te chu a la pumpelh hlawm a ni.

Nadal chuan, “Tennis ka chawlhsan hunah chuan heng thil te hi ka la thlir let ang a, kumkhuaa awm tawh tur a ni si a. Record lian leh ropui tak mai a ni a, a zawna vawi 50 chak theih chu thil harsa tak mai a ni a, mahse ka ti thei ta a, tunah chuan ka lung a awi tawk viau tawh a ni,” a ti.

Madrid Open-ah hian Juan Martin del Potro, Maria Sharapova leh Simona Halep te chu an tla tawh a. Argentinian Del Potro hian Serbian qualifier Dusan Lajovic chu 3-6, 6-4, 7-6 (8/6) in a hneh lo.

Sharapova pawh hi Netherlands nula Kiki Bertens lakah a tlawm chiang hle a, 2016 leh 2017 champion Simona Halep pawh Karolina Pliskova chuan a hneh bawk a ni.

Hmeichhe lampangah chuan Halep hnehtu 6th seed Karolina Pliskova hi a la dam zinga rank sang ber a ni ta a, rank sang dang Caroline Wozniacki, Garbine Muguruza, Elina Svitolina leh Jelena Ostapenko te chu an chak lo vek tawh a. Pliskova hi 6-4, 6-3 a chakin semi final-ah Russian nula Daria Kasatkina hnehtu, vawi hnih ngawt Wimbledon champion lo ni tawh Petra Kvitova nen an inkhel ang.