Rafael Nadal chuan tleirawl Stefanos Tsitsipas chu harsa lo taka hnehin Barcelona Open-ah a champion.
Spaniard Nadal hi an rama inkhel a ni bawk a, helai hmunah hian a che tha thei hle a, tun tum hi Barcelona Open title a lak vawi 11-na a ni ta a. Clay court-ah Nadal hi match 19 a zawnin a chak tawh a, a zawnin set 46 chu a la ta bawk.
Nadal leh unseeded Tsitsipas te hi minute 78 chhung chauh an inkhel hman a, hetah hian vawi 16 zet Grand Slam title lo la tawh Nadal hi 6-2, 6-1 in a chak a. Inrinni khan Nadal hian David Goffin a hneh a, clay court-a vawi 400 chak thei zinga 4-na a ni chiah a ni.
Kum 19-a upa Stefanos a hneh takah chuan Nadal hi World No. 1 a ni zel dawn a. World No. 63 ni mek Stefanos Tsitsipas hi Greek player zingah chuan 1973 a Nicholas Kalogeropoulos hnuah ATP final thleng leh hmasa ber a ni a, Greek tennis player zinga ATP Tour title la hmasa ber nih a tumna chu a tlawlh ta rih a. 2005 hnuah Barcelona Open finalist naupang ber niin, 2002 a Gaston Gaudio anga unseeded champion a ni ve thei ta lo.