10 Sep 2019 08:45

inkhel

Nadal-a’n $115 million chuang a vaw chhuak tawh

Rafael Nadal chuan US Open final-ah Daniil Medvedev a hneh a, Grand Slam title a lak belh leh ta a. Grand Slam title hi 19 la tawhin, title 20 latu Roger Federer chu a um pha teuh tawh hle.

Flushing Meadows-ah Nadal chu 7-5, 6-3, 5-7, 4-6, 6-4 in a chak a, title a lak khan Spanish star chuan $3.85 million (Rs. 27.67 crore) a hlawh a. 2019 kum ringawtah pawh Nadal hian $11.9 million (Rs. 85.7 crore) chu a hlawh chhuak tawh a, a vanglaia tennis atanga sum a hlawh chhuah tawh zawng zawng chu $115,178,858 (Rs. 827.83 crore) zet a tling tawh a ni.

Tennis huanga Rafael Nadal-a sum hlawh chhuah tawhah hian sponsorship leh fakna neuh neuh vel atanga a sum hai luh an chhut tel ve lo a. Chutiang zawng zawng an chhut tel a nih phei chuan a theuneu vak dawn lo tih chu a chiang hle.

Nadal hi company lian tak tak nen an inthlunzawm mek a, Nike, Kia, Emporio Armani, Babolat, Telefonica, Banco Sabadell leh Tommy Hilfiger te chu a langsar zual an ni.

Kum 33-a upa Nadal hian October 19-ah nupui a nei dawn a, Puerto Pollensa ah Xisca Perello nen an inkutsuih dawn a. Nupui nei dawn mah se Laver Cup leh Beijing-ah chuan a tel dawn tho a, hetih rual hian Shanghai leh Basel lamah chuan a inlan loh hmel a. Season tawp dawna London khawpuia ATP Tour Finals hma chuan Paris ah chiah a tel thei tawh maithei.

Rafael Nadal chuan tun season chhungin Grand Slam pali zinga pahnihah chuan title a la tawh a, US Open leh French Open ah te a champion a. A dang pahnih latu Novak Djokovic chu a nihrual thei chiah a ni.