13 Oct 2020 10:00

bakteaJr.

Mizo tlangval

​Nadal-a record tu man an khum lovang: Murray

Scottish tennis player Andy Murray chuan Rafael Nadal-a’n Roland Garros-a a record neih chu, tu man an khum theih a rin loh thu a sawi.

Nadal hian Sunday liamta khan French Open final-ah Novak Djokovic a sawpa, a vawi 13 nan French Open hi lain, ani aia French Open la hnem hi an awm lova, amah hnaih ber tu Bjorn Borg chuan vawi ruk a la tawha, an inthlau hle.

Nadal hian a vawi 13 nan French Open a lak mai bakah, French Open-a a vawi 100 chakna a ni a, French Open-a vawi 100 chak thei awmchhun a ni.

Murray chuan, “Hlawhtlinna ropui tak a ni a, tu man an tihnawn ka ring tawh lova, tu man an hnaih eih pawh ka ring lo. Pete Sampras-a Grand Slam title lak zawng zawng chu tournament pakhat atang lekin, pakhat chiahin a pha tawh lo. A bawn a ni,” a ti.

Kum 34 mi Nadal hian Grand Slam title 20 a la ta chiah bawka, Roger Federer-a record a nihrualpuia, an pahnih hian men’s singles-a Grand Slam title la hnem ber an ni.

Nadal hi tournament chhung zawnga set hloh nei lovin a champion a, kum 16 chhungin French Open-ah hian vawi hnih bak a la tlawm lo bawka, a elpui ber pahnih Djokovic leh Roger Federer-te chuan French Open hi vawi khat ve ve chiah an la la a ni.