Mizoram Volleyball Association (MVA) chuan Kum 2020 hi kum 40 (Ruby Jubilee) tlin kum ani a, kawng hrang hranga lawm a tum. MVA Ruby Jubilee lawmna atan hian a thawh khat nan, February ni 28, Zirtawpni khan Lushai Hills Residency Zarkawt ah MVA Ruby Logo Leh Ruby Jubilee T Shirt tlangzarhna hun an hmang a, Ruby Jubilee Logo hi MVA Patron Pu John Lalpeka'n a pho lang.
Pu John Lalpeka chuan tunhnaiah Volleyball in hma a sawn nasa chu lawmawm a, hei hian thalai tam tak nunkawng dik a zawh tir ngei a a beisei awm ati, Mizo thalai ten eng game pawh hi tihtakzet a kan beih chuan phak loh leh tluk loh kan nei bik lo ani ati a, Sports hmang hian Mizo ten khawvel kan la dengchhuak ngei ang ati. MVA in Volleyball Hall neih atul thu a sawi bawk ani. Theih tawp chhuah zel turin, kalkhawmte a fuih a ni.
Ruby Jubilee T-shirt hi MVA President Er H Lalzirliana (MLA) chuan a pho chhuak a, Er H Lalzirliana chuan Volleyball hruaitu hmasa te thawhrimna leh inpekna zarah MVA in Kum 40 alo tling chu lawmawm ati a, hruaitu hmasa zawng zawngte chungah lawmthu a sawi. MVA in kum 50 a tlin hma ngei hian Mizo Volleyball International player tam tak neih ngei a beisei thu a sawi a, tun ang reng a hma kan sawn chuan thil harsa anih loh tur thu asawi a ni.
Mizoram hmun hrang hrangah rualkhai taka Volleyball in hma asawn chu lawmawm atih thu a sawi bawk. District Volleyball Association 11 lai nung tak kan nei thei hi hmasawnna ani a, hmasawn zel turin ţan i la ho zel ang u a ti. Kum tluana MVA Ruby Jubilee hman ani dawn avangin District Volleyball Association leh Zone Volleyball Association te pawhin lawmna siam zel turin a ngen nghal bawk a ni. Volleyball Hall neih anih theih nan theihtawp chhuah zel atum thu asawi a, Ruby Jubilee Volleyball Hall neih a chawkawm thu a sawi bawk.
MVA General Secretary Pu C Lalrokhuma'n MVA Ruby Jubilee hman dan tur hrang hrang hetiang hian a sawi:-
1. Jubilee kum anih angin MVA in An player leh Official an hrem lai zawng zawngte a ngaidam vek a, District Volleyball Association leh Zone Volleyball Association te pawhin ngaihdamna thu hi an puan ve nghal beisei ani.
2. Ruby Jubilee hriatreng nan LOGO leh T Shirt Siam.
3. MVA Ruby Jubilee edition Volleyball siam. MVA partner NIVIA Sports nen ţangrualin MVA Ruby Jubilee lawm nan MVA Ruby Jubilee Ball siam ani dawn a. April thla a neih ţan tur Pro Volleyball League 2020 leh May thla a neih tur Inter Branch YMA Volleyball Tournament atangin hman tan tur ani ang a, kum 2020 chhung zawngin MVA tournament reng reng ah MVA Ruby Jubilee Ball hi hman ani dawn ani. District Volleyball Association leh Zone Volleyball Association te pawh kumin chhung Jubilee ball hi hmang tura beisei an ni.
4. District Volleyball Association zawng zawngte kum 2020 chhunga Volleyball Tournament an siam pakhat tal MVA Ruby Jubilee Celebration Tournament hming put tir tur ani.
5. MVA Ruby Jubilee kum anih avangin MVA in Tournament tam zawk a siam dawn ani, Veteran leh Age Group pawh siam tur ani.
6.MVA Ruby Jubilee lawmna ropui leh changtlung taka huaihawt tur ala ani a, MVA Ruby Jubilee Sovenier pawh siam bawk tur ani
(adsbygoogle = window.adsbygoogle || []).push({});