Pro Volleyball League buatsaih chhunzawm turin LPS Vision leh Mizoram Volleyball Association (MVA) an indawr a, March tawp atanga April chhunga huaihawt turin ruahmanna an siam.

January ni 15, 2020 (Nilaini) khan LPS Vision Director Pu Lalsawmliana Pachuau office, Zarkawtah pawl pahnih aiawhte an indawr a, hlawhtling taka kum li chhung an lo thawh dun tawhna chhunzawm turin inremna an siam leh ta a ni. 

R Dengthuama Indoor Stadium, Mualpuiah March tawpah tanin April chhung awh turin Pro Volleyball League vawi ngana buatsaih tum ni se an ti a, engkim chiang lehzuala puangzar thei turin an indawr zui leh ang.

Ruahman dan chuan MVA hnuaia Pro Division club, mipa team paruk leh hmeichhia team li an tel dawn. A vaiin inkhel vawi 25 awm tura ruahman a ni a, kum dang aia hmasawn leh changkang zawka huaihawt ni se an ti bawk.

2016 khan a vawi khat nan pawl pahnih tangkawpin Pro Volleyball League an buatsaih a, hlawhtling taka kalpui niin kum tin neih chhoh a ni a, nikumah April 16 atanga May 16 chhungin Chawnpui Sports Centre-ah huaihawt a ni.

Chhinga Veng Spikers an champion a, inhnehtawk takan set nga an inkhelh hnuah Durtlang North an hneh. Hmeichhe team-ah Durtlang an champion a, under 18 mipa team-ah Anastasia Electric Veng an champion bawk.

MVA General Secretary Pu C Lalrokhuma chuan LPS Vision chungah lawmthu a sawi a, Pro Volleyball an buatsaih atangin Mizoram volleyball-in kawng hrang hrangin hma a sawn bakah a darh phah hle niin a sawi.

"December-a neih zawh tak Mizoram State Games-ah bial tin atangin mipa team an chhuak vek a, bial 36 atangin hmeichhe team an inel bawk. Team inelna zingah volleyball-a chhuak an tam ber a, hei hi Pro Volleyball rah langsar tak a ni," a ti.