Mizoram Volleyball Association buatsaih Invitation Tournament ni thum na chu October 15, 2015 khan Tuikual Indoor Stadium-ah khelh zawh a ni leh ta. Inkhel hmasa berah hmeichhe team final luh in chuhin, Power Deptt. SC leh Electric VC te an inkhelin, Power Deptt. SC in Eletric VC 3-0 sets (25-20, 25-16, 25-13) hnehin final an lut. Inrinni tlaiah Mizoram Police nen final an khel dawn a ni. He match-ah hian Vardingliani, Power Deptt. SC spiker chu player of the match atana thlan a ni.
Inkhel tum hnihna Mipa TNT leh BSF te inkhelin, TNT in set khat an hlauh hnuah insiam thain 3-1 sets ( 23-25, 26-24, 25-19, 25-17)in BSF an hneh a. Pool B leader niin semi final an lut. He match-ah hian BSF spiker Batachary chu man of the match atana thlan a ni.
Inkhel hnuhnung berah ARC, Shillong leh Young Star United an inkhela. Semi final luh in chuhah ARC, Shillong an chung nung zawka. 3-0 sets (25-15, 25-18, 25-19) a hnehin semi final an lut. ARC setter M. Boy Sigh chu man of the match atan thlan a ni. Pool A atangin 3rd Battallion MAP leh ARC, Shillong ten semi final an luta. 3rd Battallion MAP hian pool match-ah hnehna chang vekin pool leader an ni a. ARC, shillong pool runner up an ni
Pool B atangin TNT leh Hunthar Volleyball Club ten semi final an luta. TNT in pool matchah an khingpui hneh vekin pool leader an ni a. Hunthar volleyball club pool runner up an ni.
October 16, Zirtawpni tlai dar 2 atanga khelh tan a ni ang.
Inkhel hmasa zawkah Pool A winner 3rd Battallion Map leh Pool B runner up Hunthar volleyball club te an inkhel dawna. 3rd Battallion MAP hi pool match-ah chak veka semi final lut an ni a, Hunthar Volleyball club hian TNT an hneh loh hnuah BSF hnehin semi final an lut. Hemite team hnih hi MVA season openingah khan in tum tawhin Hunthar Volleyball club hian 3-0 sets a hnehin an champion zui. 3rd Battallion MAP hian season opening tournament-a an hneh loh hi hneh loh nawn an duh dawn lova, Hunthar VC tan hneh hnu tia inthlah dah a theih dawn bik loh a ni.
3rd Battallion MAP tan hian captain Zomuanpuia an innghahna a ni leh dawna. Senior players Lalhmuchhuaka an neih tawh avangin season opening nen chuan team danglam daih an ni ang. Hunthar Volleyball club tan fiahna a ni dawna. Remsangzuala leh Lalbiakmuana te an innghahna a ni leh ngei anga. 3rd Bttallion MAP mizoram senior players tha awmkhawmna leh Tleirawl thaza rual Hunthar VC inkhel tur hi inkhel nung leh hmuhnawm tak a ni ngei ang.
Inkhel hnuhnung zawkah Pool B winner TNT leh ARC, Shillong-te an inkhel dawna. TNT hi pool matcha chak veka semi final lut an ni a, ARC, shillong hi 3rd Battallion MAP laka an tlawm hnuah in siamthain Young Star united hneha Semi final lut an ni thung.
TNT tan hian senior player Lianthangpuia an innghahna a ni leh dawna. A ni hi team tana player pawimawh leh innghahna a ni a. Lalchhanhima game a puitling tawh bawk avangin inrin tawkna nasa leh zual an nei ngei ang. ARC, shillong tan hian Tomba Sigh leh Samanda sigh te an innghahna a ni dawna. Game rang tak khel team ve ve an nih avangin inkhel rang leh hmuhnawm tak a ni ang.