Mizoram Volleyball Association (MVA) chuan 2020-21 Season atan Club leh Player Registration a rel fel. Pro Division Club ah Hmeichhe Club 4 (pali) 1.Durtlang Volleyball Club 2.Bethlehem vengthlang Volleyball Club 3.Kanan Volleyball Club 4.Bungkawn Volleyball Club ten Registration an ti a, Mipa ah Club 5 ( panga) 1.Hunthar VC 2.Chhinga Veng Spikers, 3.Tuichangral V.C 4. TNT VC 5.Durtlang N VC ten registration an ti.

Chanmari West SC erawhin Covid 19 avanga Sponsorship an hmuh loh avangin registration hi an ti thei ta lo a ni. MVA ah hriatthiamna an dil a, MVA chuan a pawm. Mipa leh Hmeichhe Volleyball Club engemaw zatin MVA hruaitute hnenah Pro Divisioin Club-a awm an dil a, Hemi chungchang erawh 2020-21 MVA Committee hmasa ber in ala ngaihtuah dawn a ni.

Mipa Pro Division Club-in player an register dan tlangpui:-

1.Tuichangral VC : Tuichangral VC te hi an President Isak Malsawmtluanga ( Zaithiam ) hovin Transfer period ah an che na ber in alang. Player 17 (sawmpasarih) an register a, heng zingah hian Star player an thahnem hle. An Captain David Lalramhmachhuana leh Lalrinchhana (Chhantea) maubawk an hum thei a, Hunthar VC atangin Player tangkai leh ball thiam Lalruatfela Sailo an chhuhsak thei hi a mak ani, Mizo Middle Blocker tha pathum, Mangila (Kolasib) Malsawmsanga (Bawngkawn) leh Rinhlua (Rulpuihlim) te an la thawt bawk a, Tin Rawngbawla leh Dawnga (ExPolice Player ) an la la thei zui bawk a, Tournament khelh an chak tawhin a rinawm.

2. Durtlang N VC: Vanduai vang chauha 2019 PVL Champion lo Durtlang North VC ten Player 18 an Register a, Heng zinga 5 phei chu hnam dang an ni. An Player tha Zomuana leh Tharnghaka an hum thei hram a. PVL Mizo player tha ber vawihnih lai ni thei Biakmuana an la chelh thei bawk a. Samsona (zemabawk) leh Player thangduang Fabian (Kolasib) an neih bakah, Chanmari W Star Player Vanlalpeka an kawl thar bawk a, Season hmasa ai chuan an Squad chu a chhah sawt ang. An Hotupa Dr.Muantea a awm mai mai lo tih a hriat e.

3.TNT VC : Volleyball Club hlun TNT in Nomawi an chawi lo rei tawh avangin, 2020-21 season erawh an Player lak dan atangin NIL an tum lo tih a hriat. Player 13 chauh an register a, An Captain Vanlalchhantluanga’n ala ho thei dawn a, Club dang awh rawn Rinzuala Hnamte leh Sadraka te unau an hum thei hram a, Tunlai Volleyball player hot ber Laldinchhunga (Tlangsam) an nei hi TNT thatna tur ani. Rawlthar duhawm pahnih Vanlaltanchhana (6.2 Feet) Kawnpui leh Zosangzuala (6.1 feet) Kanan Kum 20 la tling lo ve ve te hi an thatpui hle thei ang.

4.Chhinga Veng Spikers : PVL 2019 Champion Team Chhinga veng Spikers hian Player 13 Register in, heng zingah hian hnam dang 3 an tel ani. CVS hotupa Jessie-a hian fing takin an player mamawh chat chat zel ala tih a hriat hle. Mizo Setter duhawm Biakhlua (Tualte /Armed S) an la thei a, Middle Blocker Lianmawia ( Chungtlang) an la thei bawk a. Ex Police Player Ramngaiha (Hlimen) an nei hi an vanneihna ani. Engtik lai maha Tournament khel chhe ngai lo. ITI Volleyball Star Nunpuia an chang hi an team tlo na tur ani. Libero tha tak mai an lak thar Ruatsaka (Tualte) hi an game siamtu tur ani. PVL 2021 ah champion ngei an tum tih a hriat e.

5.Hunthar VC: HVC President K Lalthanzama (Joseph Construction) hian pawn lam player lak teuh aiin vengchhung player chherchhuahte rinngam a thupui zawk niin a lang, An veng Rawlthar tha tak tak 5 zet Pro Division a la khel ngai lo an la a. Chutih rualin Mizo Volleyball Star player lak nan sum an ui chuang lo. Club dang in an duh rawn an Captain Remsangzuala (Hunthar) an la kawl zel thei a, Edenthar Tlangval ball vaw na an lak thar Muanpuia hi an thatpui ang, 2018 PVL Mizo Player tha ber Ramnunfela (zawlnuam) an la thei lehzel hian an inpekna ati lang, 2019 PVL Libero tha ber Biakzauva an nei thei hi an vannei. Mizo zinga player complete ber mai Laldensanga an chang hi team dang aia an team danglam na tur ani. Hunthar VC hian Player 15 an register a ni.

(adsbygoogle = window.adsbygoogle || []).push({});