23 Jul 2020 02:25

inkhel

MVA in 2019-20 Season a khar

Mizoram Volleyball Association (MVA) chuan July ni 22, 2020 khan kum 2019-20 atana Meeting hnuhnung ber neiin President Er H Lalzirliana chuan a kaihruai a, Meeting-ah hian MVA 2019-20 Season tawp lam chu Covid 19 hripui avanga mumal taka kal anih theih tak loh avangin a khar ta nih thu sawi a ni.

He season khar na hi District Volleyball Association, Zone Volleyball Association te pawhin an zawm ve nghal ang. Tin, 2019-20 atan General Body Meeting chu sawrkar dan in mipui punkhawm vak ala phal rih loh avangin neih rih loh mai tura rel a ni.

PRO DIVISION CLUB :

Covid 19 hripui avanga 2019-20 Season ah Pro Volleyball League neih theih anih tak loh avangin, Pro Division atanga Club tla tur leh leh kai tur ruahman fel a harsat tak avangin, Season thar (2020-21 Season)-ah 2019-20-a Pro Division Club awm sa Mipa TNT V/C, Hunthar V/C, Chanmari West V/C, Chhinga Veng Spikers, Durtlang North V/C, Tuichangral V/C an awm chhunzawm ang a, Hmeichhia Bethlahem Vengthlang V/C, Kanan Veng V/C, Bungkawn V/C, Durtlang V/C te chu awm chhunzawm tura rel a ni.

Club Registration: Meeting in 2019-20 a khar tak avangin Season thar atan in buatsaihna kalpui nghal ani a. 2020-21 atana Club leh Player Registration hawn hun rel nghal ani a, a hun atan Ni 6-8 August 2020 ani. Hemi hun chhung hian registration tihfel vek tur a ni.

MVA General Body Meeting 2017 in a lo rel tawh angin Player registration neih hun hi District Volleyball Association, Zone Volleyball Association leh Pro Division Clun ten a rualin an hmang vek ang. Player Registration ah hian MVA, DVA leh Zone VA te hriatpui loh Club leh Player ten inremna an neih chuan, thutlingah pawm ani lovang.

Meeting ah hian MVA General Secretary Pu C Lalrokhuma’n 2019-20 season MVA Report tlangpui a pe a, sum hmuh zawng zawng leh hmanna bakah ba an la neih thu a sawi bawk. Pro Division Club (A) Mipa club 6 leh (B) Hmeichhia Club 4 te register a ni bawk.

Volleyball Federation of India buatsaihin ni 30.12.2019 atanga 2.1.2020 khan Bhubaneshwar, Odissa-a National Volleyball Referee Exam-ah MVA State referee 5 Mipa 3 leh Hmeichhia 2 tirh a ni a, result nghah mek a ni. Mizoram Sawrkarin District thar pathum Saitual, Hnahthial leh Khawzawl a hawn tak

avangin MVA pawhin heng District thar pathumah hian District Volleyball Association a hawng ve nghal a, Mizoram Sports Discipline te zing ah District Sports Assocoation hawng kim hmasa ber an ni.

Kum 2020 hi MVA kum 40 na Ruby Jubilee ani a. MVA chuan uar taka lawm a tum a, a lawmna bul tana nan ni 28.2.2020 khan MVA Ruby Jubilee Logo leh T Shirt an tlangzarh a, Ruby Jubilee hi lawm zel tura kan inbuatsaih laiin Covid 19 vangin kan lawm chhunzawm theih a ni lo.

Ni 28-31 January 2020 khan MVA Inter District Volleyball Championship chu Siaha ah buatsaih ani a, Hnahthial Mipa Team tih loh chu District Volleyball Association tin Mipa leh hmeichhe team an tel kim a, heng District Volleyball Association Team te hi MVA chuan TA a pe vek a ni. Ni.12.3.2020 khan Volleyball Federation Of India General Body meeting Cum Election chu Jaipur, Rajasthan ah neih ani a, MVA Senior Vice President Dr Lalmalsawma Nghaka leh

MVA GS Pu C Lalrokhuma te MVA aiawhin an tel. Dr Lalmalsawma Nghaka chu VFI Vice President ah chuhtu awm lova thlan ni a, amaherawh chu mi thenkhatin Court ah an zualko avangin Result hi puan ala ni lo.

Covid 19 hripui avanga harsatna tawkte tanpui nan Chief Minister Relief Fund ah MVA chuan Rs111000/@ a pe a, heng a sum pek te hi MVA Executive, DVA , Club leh Volleyball tana mithahnem ngaite thawhkhawm a ni.

(adsbygoogle = window.adsbygoogle || []).push({});