29 Jan 2018 02:11

digimalt

​Muthilh that a pawimawh hle (Hriselna)

‘Why we sleep’ tih lehkhabu ziaktu University of California, Berkeley-a Professor of neuroscience and psychology, Mathew Walker chuan zâna muthilh that hi mihring mamawh a nih thu leh hrisêl lohna tam tak thlentu chu mut tlêm vâng a nih thu a sawi.

Tech Insider-a Professor Mathew Walker-a thusawi hi târlang chhawng ila. Mut that loh avâng hian thluaka hriatrengna bâwm a buai thei a. Zân rei tak tak thlengin lehkha i zir a, thluak a chawmawlh hun a awm thin. Chûngah chuan i lehkha chhiarte hriatchian a har tawh êm êm thin. Chuta tang chuan muttlêm hian hriatna nasa takin a nghawng thei tih a chiang.

Mut tlêm avâng hian i thluakah protein tha lo a chhuak nasa a, chûng chu beta amyloid an ti a. Chu chuan Alzheimer disease (thil hriatreng theih lohna natna) a thlen thin bawk. Zân muthilh lai hian thluaka tui awmte chuan chûng protein tha lo ho chu a thuahfai a, i mu tlêm thang a nih chuan chûng protein tha lo ho thuahfaina hun chu i pe tam thei ta lova, thluakah chûng protein thalo chu a tam phei chuan nunna tan pawh a pawi thei hial thin.

Mut tlem hian nghawng tha lo deuh deuh taksaah a nei chhunzawm bawk a. Chithlahna kawngah nghawng thalo tak a nei thei, mipa zîngah zâna dârkâr 5 -6 lek mu thin chuan testosterone lamah harsatna an neih phah a, an kum zât aia kum 10 vêl laia upa angin an lan theih phah thin. I mut tlêm than chuan i lang upa hma dâwn tihna a nih chu.

Mut tlêm avâng hian taksaa immune system (natna hrik lo do thinte) an chak loh phah thin bawk a, zan khat lek pawh dârkâr 5-6 i mut chuan immune system chakna kha 70% laiin a tlahniam nghâl thei. I mu tlêm thang anih chuan cancer natna kai a awlsam bîk êm êm a. Pumpui cancer te, chikawng cancer te leh hnute cancer te hi mut tlêm than avânga kai awlsam te an ni. Zân lama hnathawk mite an awm a, World Health Organisation pawhin hei hi a vei hle a, hna avânga cancer vei phah hi an tam hle nghe nghe a ni.

Mut that loh avâng hian cardiovascular system (taksa bung hrang hranga thisen insemdarh dân) a buai thei a. Zâna tui taka i muthilh lai hian blood pressure a tlahniam a, lungphu a muang a, taksain hahdamna hun a hmang tihna a ni. Lungphu leh blood pressure a muang a, taksa a hahdam hnuah thatho takin a rawn che chhuak leh thin, chu chu reboot system an ti. I mu tam lo a nih chuan chutianga taksa khâwl rawn nung thar leh ang chu i tawng tam dâwn lo tihna a ni. I muhil tam lo a nih chuan i blood pressure a sâng zêl anga, lungphu châwla thihna, stroke te leh lung tha lo avânga harsatna neih theihna chance chu 200% lai a ni dâwn a ni.

Sap ramah chuan day light saving time an ti a, nipuiah chhûn a rei a; zân a tâwi a. Thlasikah zân a rei a; chhûn a tâwi thung. Khawvêl mipui 1.6 billion te kum hnih chhûng an zirchiannaah; thlasik lai aiin nipuiah 24% laiin lung lama harsatna nei an pung thin, hei hi a chhan chu khatin khawvêl mipui tam zâwk an mut tlêm vâng a ni.

Mihringin muhil lova hun a hman rei theih chhûng an chhût dânah chuan darkar 16 vêl a ni a, chu chu thluakin thatho taka hna a thawh theih tawh loh hun atanga chhut a ni. Zînga i harh atanga dârkâr 16 a nih hnuah chuan thluak a nguai tan a, taksaah pawh nguaina a rawn thleng nghal bawk a. Dârkâr 19 atanga dârkâr 20 vel i harh chuan thluak hnathawh nasa takin a buai tan a, motor i khalh a nih ngat phei chuan zurui ang maiin i tlân ngil thei tawh lo anga, chetsual a hlauhawm tawh êm êm thin.

Dam rei i duh chuan i thluak dîm la, thluak dîm dân chu muthilh that a ni. Mihring dam tha pangngai tân dârkâr 8 muthilh a tâwk a, a bîk takin zâna mut hi taksain a ngeih bîk bawk. Zîng thawh hma hi a tha bawk a, nilêngin mi a vawng thei thin, chuvâng chuan zân lamah mut hmaa, zîng thawh hma hi hrisêlna a ni.