11 Jan 2019 12:15

inkhel

​Murray-a’n a chawlh hun tur a sawi

British tennis player Andy Murray chuan tennis khelh a chawlhsan hnai tawh niin a langa, a chawh hun tur a sawi.

Andy Murray chuan kumin Wimbledon zawha tennis khelh a chawlhsan duh thu sawi mahse, Australian Open chu a Grand Slam khelh hnuhnun ber a ni maithei tih thu a sawi tel bawk. Grand Slam title vawi thum lo la tawhtu Murray hi a kawng bawrah hliam a nei a, a dam hleithei lo.

Melbourne-ah a chawlh hun tur chungchang hi mittui tla chungin Murray chuan chanchinbu mite a hrilha, kum 31 mi chuan, “Ka kawng na avang hian thla li emaw thla nga chhung vel bak a rei berah ka khelh theih ka ring tawh lo.

“Wimbledon hi khelh a, tennis khelh chawlhsan ka duh a, mahse chu chu ka ti thei dawn em ka hrelo. A chhan chu Australian Open zawh pawh hian ka chawlh a ngai tawh maithei. Thla 20 chhung na neiin ka awm tawha, rei tak ka tuar tawh. Ka kawng damna tur hian thil tih theih zawng zawng chu ka ti a ni bera, hma ka sawn phah lutuk lem lo.

“Thla ruk kalta ai kha chuan hma ka sawn viau tho na in, na ka la tuar nasa hle. Ka la khel thei a, mahse a hma ang chuan ka khel thei tawh lo,” a ti.

Hun rei tak chhung British no.1 lo ni tawh Scot player Murray hi inhliamin a tlakbuak nasat em avangin a nih tur ang a ni pha lo pawh a tih theih awm e. Kum 31 mi chauh a la ni a, a rilru lamin tennis khelh chu la chak in la peih viau mahse a taksa lamin a peihlo san a ni bera, a vanduaiin a uiawm hle dawn a ni.