FIBA hriatpuinaa India rama a vawi khatna atana buatsaih 3x3 Pro Basketball League (3BL) final round chu August 25 leh 26 hian Mumbai khawpuiah an khel ang.
3x3 Pro Basketball League (3BL) final round chauh khelh hmabak a ni tawh a, August 25 leh 26 hian Mumbai khawpuia Phoenix Marketcity, Kurla ah khelh a ni dawn a. Round 6-na leh final round-ah hian team tha rual Delhi Hoopers, Ahmedabad Wingers leh Bangalore Machas te chu an tel dawn a. A thlengtu Mumbai Hustlers te pawh Bikramjit Gill hoin an duai lo viau tura ngaih an ni.
Bangalore khawpuia 5th round an khelh tumin 3BL chu player te leh fans te atangin a hlawhtlinzia a lang chiang a. Mumbai Hustlers chu che tha viau mahse Delhi Hoopers te chu point hmu hnem ber an ni tho a, an hnuaiah hian Ahmedabad Wingers leh Bangalore Machas te chu an awm bawk a. Aizawl Legends leh Jaipur Regals te chu mi beisei aia che tha an ni a, team lian hmaah khawng taka an khelh theih avangin final round-ah hian boruak nei lian thei viau tura beisei an ni.
June 2018 atanga bul tan, 3BL hian India rama 3x3 basketball player te tan kawng thui takin a hawng a. 3rd round-a champion Delhi Hoopers chuan khawvela 3x3 team dangte leh player dangte nena inkhelhna hun tha July thlaa FIBA 3x3 World Tour, Utsunomiya Masters ah khan an neih phah a ni.
3BL hian grassroot level atanga 3x3 basketball chawisan chu a tum ber a ni a. Team hrang hranga star player te hmang tangkaiin hma an la chho zel dawn a, player naupang deuh zawkte tan 3BL match neihna hmun hrang hrangah coaching clinic an lo buatsaih tawh hlawm a. 2020 Tokyo Olympic ah 3x3 basketball hi telh a ni dawn tih an puan atangin India hian medal dawng thei khawpa lo inpuahchah tumin hma a la chho a ni.
Final round khelh tur chungchangah 3BL Chairman Yoshiya Kato chuan, “Final round kan thleng ve ta der mai a, hetiang taka hun lawmawm kan thleng thei hi a ropui kan ti a, hun chhinchhiahtlak tak a ni a. A tir atang khan he tournament hian hlut a hlawh em em mai a, India ram chhungah 3BL hmalakna avang hian basketball chuan ngaihven a hlawh phah hle a. Hun lo la awm zel turah hei aia 3x3 basketball boruak lian zawk a awm theih nan hma kan la zel dawn a ni,” a ti.