Muguruza hmaah Sharapova a che thei lo

07th June 2018, 02:06AM

Garbine Muguruza chuan Maria Sharapova chu 6-2, 6-1 in a hneh a, French Open semi final a lut a. Semi final-ah hian Simona Halep a hmachhawn ang.

3rd seed Muguruza leh Sharapova te hi tun hnaia tum thum an inkhelhah Sharapova hi a chak vek a, Sharapova hian Grand Slam title 5 a lak zinga pahnih chu Roland Garros-ah hian a la a ni.

Muguruza hian kumin chhungin Roland Garros-ah hian set a la hloh miah lo a, Paris khawpuiah a vawi hnihna atan champion a tum hle a, a champion a nih chuan trophy lian tham vawi thum a lakna a ni thei bawk ang a. 2016 khan Muguruza hi French Open-ah hian a lo champion tawh a, nikum khan Wimbledon-ah a champion bawk.

ESPN Stats & Information in a tarlan dan chuan hmeichhe zinga set hloh miah loa French Open champion ni thei hnuhnung ber chu Justine Henin a ni a, 2006 leh 2007 te khan a champion a. Hetianga ti thei tur hian Muguruza chuan vawi hnih khelh chiah a ngai tawh a ni.

Garbine leh Maria te hi an inkhel rei lem lo hle a, minute 70 chhungin Muguruza hi a chak hman der a. A tir atangin Sharapova hian a khel tha lo hle a, tihsual a ngah em em bawk a ni.

Simona Halep chuan a khingpui Angelique Kerber chu 6-7 (2), 6-3, 6-2 in a hneh a, semi final hi a lut bawk a, Garbine Muguruza nen an inhmachhawn dawn a ni.

Copyright © inkhel.com 2024. All rights reserved.