Muay Thai Association Of Mizoram (MAM) chuan January ni 26, 2018 khan Hawla Indoor stadium conference hall-ah kum 2018 atanga 2020 general headquarters hruaitu tur thlanna hlawhtling takin an nei. Muaythai hi Mizoram Sports department hnuaia fund neia sport discipline pawmte zingah a tel ve avangin uluk takin he inthlan hi United Sports Association of Mizoram (USAM) kaihhruaiin Mizoram State Sports Council (MSSC) thlazar hnuaiah neih a ni. Office bearers 7, executive member 8 leh Mizoram chhunga club (veng/khua) hrang hrang aiawh mi 30 ten vote an thlak. Hruaitu thlan tharte chu heng mite hi an ni:
- 1.President: Brian Lalnunhlima, Bugnkawn
- 2.Senior Vice President: C. Lalenga, Chaltlang Ruam Veng
- 3.Vice President: Samuel Lalrozâma Hmar, Dawrpui
- 4.General Secretary: H. Lalmuanpuia, Chanmari West
- 5.Assistant Secretary: Lairothanga, Thuampui
- 6.Treasurer: V. Lalmuankima, Ramhlun N
- 7.Financial Secretary: Lalhmachhuana, Chaltlang
Inthlanpuitute:
- 1.Returning Officer: Pu Lallianthuama, President, USAM.
- 2.Polling Officer: Pu Lalduhkima Sailo, Joint Secretary, USAM.
- 3.Observer: Pu C.Lalrinzuala, Joint Secretary, MSSC.
President-a thlan thar Brian Lalnunhlima hi journalist [Mizo Aw editor & MBBA Times (Mizorama Magazine chhuak Digital Print awm chhun) Editor-in-Chief] niin sport promoter chak tak a ni. Aquatics Association of Mizoram-ah founder leh General Secretary lo ni tawh thin a nih bakah Muaythai Association of Mizoram-ah pawh General Secretary hna lo chelh reng tawh a ni. Mizoram State Sports Council-ah member a nih bakah United Sports Association of Mizoram-ah General Secretary a ni mek bawk. Sports Writer of the year award pawh vawi hnih lai a lo dawng tawh a ni (2010 & 2013). Senior Vice President thlan thar C. Lalenga pawh hi journalist (Tlangram Monthly Magazine editor) a ni a, Muaythai promoter tha tak niin hruaitu hlun a ni. General Secretary thlan thar Lalmuanpuia hi combat games lama sulhnu nei ngah tawh tak a ni a, Asian Championship medalist a nih bakah Muaythai national referee & judge a ni bawk. Assistant Secretary thlan thar Lairothanga leh Financial Secretary thlan thar Lalhmachhuana te pawh hi national level Muaythai player an nih bakah national referee & judge an ni ve ve. Treasurer thlan thar V. Lalmuankima hi Mizote zinga Muaythai international level training nei hmasa ber a ni a, international player leh qualified coach a nih bakah national referee & judge a ni bawk. Vice-President thlan thar Samuel Lalrozama hi international player lo ni thin leh national coach pawh lo ni reng tawh a ni a, world body hnuaia ranking (art danga belt exam ang)-ah Red-yellow mongkun (12th Khan) a ni a, India ramah he level leh a chung lam hi mi 5 chauhin an la thleng; international referee & judge a nih bakah Mizote zinga world championship-a referee hmasa ber a ni nghe nghe.
President thlan thar Brian-a chuan ti hian thuchah tawi a sawi: “Bung thar kai turin tunah hian Muaythai Association of Mizoram a inpuahchah tan ta mek a, kan hmazawn theuha kan tih tur awmte hlen turin Muaythai lovers zawng zawngte inbuatsaih ang u. Mizoram mai ni lo, India leh khawvel huapah pawh he game hian hriat a hlawh em em a, Olympic-ah pawh kan la hmu thuai mai thei. India hmarchhak kilah awm mah ila, India level-ah Mizote kan duai lova, hriat kan hlawh em avangin kalphung fel tak nen he pawl hian ke a pen phawt chuan rei loteah India awpbettu kan ni thuai ang tih hi ka ring tlat a ni.
“India rama lang pha tur chuan a bul tan nan Mizoramah nung taka he game hi kalpui phawt a ngai a, chuvangin Mizoram pum huap inelna lian MAM chuan buatsaih thuai a tum. Player-ten insengsovin he game hi an khel a, theihtawp chhuahin an practice-a, chuvangin an thiamna leh theihna pholanna tur platform tha tak buatsaih hi pawlin a bat a ni. Lo dam zel la, lo inbuatsaih a, inbeihna tualah kan inhmu dawn nia.”
General Secretary thlan thar Muanpuia pawhin duhthawh takin ti hian a sawi ve: “Mizoram state-ah Muay Thai hmasawnna thlen thei tura min ngaia min thlangchuak tute min beisei ang ngei a kan infiammite leh kan Ram Mizoram hi khawvel pho chhuak turin leh kan Ram chung ngeiah pawh tun aia nasa zawk a Muaythai game hi vawrh lar a, a ropui zel theih nan kei leh ka thawhpui mifel leh chak tak takte hian Pathian leh kan Ram tan kan theihna kan hmang dawn ani. MUAYTHAI vul zel rawh se.”
Vice President thlan thar Samuela chuan miten ring ngama an thlan vangin lawm thu a sawi a. Thawhpui tha tak tak, technical mi leh tunlai khawvel mila rorel thiam mi inpe zote a neih vangin Muaythai maiah ni lovin Mizoram thalaite leh Mizoram tan pawh he pawl kal tlang hian hmasawnna a thlen theih ngei a beisei thu a sawi. He martial art; kut, ke, khup leh kiu hmanga infiamna rothap tak mai hi combat games-ah chuan khawvel mite ngaihsak berte zing ami a ni chho mek a; Olympic Council of Asia, WADA, GAISF, FISU, TAFISA leh body lian dang tam tak ten an pawm tawh a ni, a ti. Tin, Kum 2016 December thla khan International Olympic Committee chuan Muaythai chu provisional recognition pe-in kum tin $25,000 fund a pe ziah a; kum thum hnuah Olympics Games sport zinga tel turin an apply thei dawn a; future a bright hle a ni, tih a sawi. Samuela chuan Technical lam chak taka an kalpui tur thu sawiin, state leh national event pangngai bakah committee hmasa bera relho tura chhawp chhuah tura hma lakna tur dang a sawite chu Mizoram chhungah ngei Muaythai league lian siam, ram pawna Pro league buatsaihtute nen thawhho, international coach chah luh, a khat tawka instructor seminar leh referesher course neih, national level referee and judge tam thei ang ber chher, national executive body-ah Mizoram hruaitute member ni ve tura hma lak, district capital tlawha Mizoram puma club (unit/branch) a tam thei ang ber din, World body – IFMA kal phunga Commission hrang hrang din (Ethics, Youth, Female, Entourage, Legal, Medical leh Athletes commission-te), international player tam thei ang ber chher chhuah leh world headquarters – Thailand lama training lak te a ni.