Nizan Wembley Stadium-a Champions League final match-ah khan, mual chhunga tlan luh tum mi thahnem tak an awm a, mi 50 aia tam Police te chuan an man niin The Athletic chuan a tarlang.

Entu zinga mi 3 te chu inkhelh bul tan chhoh laiin mual chhungah an tlan lut a, pakhat tlan luh a tum laiin man a ni bawk. Match an tihbuai avang hian minute 2 vel inkhel a khaihlak nghe nghe.

Wembley Stadium spokesperson chuan, "Wembley Stadium mual chhunga tlan luh hi dan phal loh a ni a, UEFA Champions League kick off a ni chiah a, tlan lut te kha na takin kan dem a ni.

"Khang ho kha man an ni vek a, thuneitu lamin an chungah dan angin thuneihna an lek kawh dawn a ni," tiin a sawi.

Mual chhunga tlan lut leh, tlan luh tum te zawng zawng nen Metropolitan Police te chuan mi 53 an man thu thuchhuah an siam bawk.

Inkhel pawimawha hetia inkhel tibuaia tlan luh hi thil thar a ni hran lo a, match pawimawh hrang hrangah kan lo hmu tawh thin.

Tun tum erawh heti zat tlan luh tum an awm chhan chu Russian streamer 'Mellstroy' vang niin media thenkhat te chuan an tarlang.

Ani hian 'Mellstroy' tih inziak kawr ha chunga Champions League final khelh laia tlan lut hmasa ber hnenah £300,000 pek a tiam.

Inkhel tan a ni chiah a, mual chhunga tlan luh tum thahnem tak an awm nghal a, £300,000 hi India pawisa chuan ₹ 3,18,91,225 lai niin, a awhawm ve bawk em a ni.