MTB Mizoram 2019-ah Mesak Vanlalvena

23rd June 2019, 05:06AM

Mizoram Cycling Association (MiCA) in Mizoram a thirsakawr intlansiak a buatsaih hmasa ber MTB Mizoram 2019- ah Sihfa tlangval Mesak Vanlalvena chu pakhatna a ni. Kilometre 20 a thui intlansiakah hian Mesaka hi minute 57 leh second 46.59 ah a thleng a, 2 na Vanlalruatpuia, Saikhamakawn chu darkar 1 leh second 14.63 ah a thleng a ni. 3-na Vanlalremsanga, Mission Vengthlang chu darkar 1 minute 2 leh 0.98 seconds ah a thleng ve thung.

Inrinni tuk (June 22, 2019) a thirsakawr intlansiak ah hian mi 27 an tel a, a tel zawng zawngin course an tlan chhuak vek a ni.

Aizawl chhim daifema Zampuimanga hriatrengna lungphun, Silaimual atangin rider te an tlan tan a, Hualngohmun khua an hĂȘl a, Samtlang khua-ah chhuak chho in Lungleng Lal In kawtah an tawp a ni. MTB Mizoram 2019 ah hian kawng chhuk chho a tam em em a, Nikir thla khawlum hnuaiah rider te an inel a ni. MiCA chuan a vawikhat nana intlansiak hlawhtling tak an buatsaih thei chu lawmawm an tih thu an sawi.

Kum 50 a upa, Pu Malsawmkima (Maski-a), Mission veng chu a tel zinga upa ber niin darkar khat leh minute 34 ah a tlan thleng a, a pumpuiah 18 na a ni. A tel naupang ber chu Lalruatfela (Mafeltea), Bawngkawn niin kum 14 a upa a ni a, darkar 1 leh minute 11 ah a thleng a, a pumpuiah 10 na a ni phak a ni.

Pakhatna Mesak Vanlalvena hian lawmmanah pawisa fai Rs. 10,000 bakah action camera (Rs. 19,000 man hu) leh G-Shock sana (Rs. 10,000 man hu), trophy, medal leh certificate a dawng a. 2-na Vanlalruatpuia chuan Rs. 7,000 bakah Action camera leh G-shock watch, trophy, certificate leh medal a dawng a ni. 3-na Vanlalremsanga chuan Rs. 5,000 bakah Gshock watch, Trophy, certicate leh medal a dawng bawk.

Intlansiaka tel zawng zawng zawngten certificate leh medal an dawng vek bawk a ni.

He thirsakawr intlansiak hi MiCA chuan an vawikhat buatsaihna anih vangin Mizoram chhunga chengte tan chauh an ti hrih a, hun lo awm turah changtlung leh zau zawka tel theih tur intlansiak puitham zawk buatsaih chhoh zel an tum a. A vawikhatnaah rider sawmhnih chuang zet an tel thei chu lawmawm an tih thu sawiin, intlansiak a hlawhtlin nana tanpuina pawisa fai leh bungraw hrang hrang petu (sponsor) te chungah lawmthu an sawi a ni.

MTB Mizoram 2019 buatsaihtute chuan Cycling intihsiaknaah bungthar an kai chho nia an hriat thu an sawi a, kumin chhunga thirsakawr intlansiak buatsaih leh ngei an tum thu an sawi.

Top Three Results —

1. Mesak Vanlalvena (Sihfa) 57 Min 46.59 secs

2. Vanlalruatpuia (Saikhamakawn) 1 hr 00 min 14.63 secs

3. Vanlalremsanga (Mission Vengthlang) 1 hr 02 min 0.98 secs

Copyright © inkhel.com 2024. All rights reserved.