31 Jul 2020 04:08

inkhel

MSSC Secretary thlahna leh a thar lawmna hun hmang

 Mizoram State Sports Council Secretary kalchhuak ta Pu C.Laltlanthanga thlahna leh Secretary thar Pu John Tanpuia lawmna hun July ni 31, 2020 (Zirtawpni) tlai dar 4:00 khan Aijal Club-ah Sports Minister hova neih a ni a, he hunah hian Mizoram State Sports Council hnuaia Association hrang hrang aiawh leh United Sports Association hruaitu bakah department lam hotute telin tlaiah zanriah an kilho nghal.

Thlahna leh inlawmna hun hi Pu Lalrinawma, MCS, Addl.Secretary, SYS chuan a kaihruai a, Sports Minister Pu Robert Romawia'n MSSC Annual Programme 2020-2021 leh Annual Reports 2019-2020 tlangzarhna hun hmangin Minister bakah hian Secreatry kalchhuak leh Secretary thar ten thusawina hun an hmang bawk.

MSSC Secretary kalchhuak ta Pu C.Laltlanthanga leh Secretary thar tur Pu John Tanpuia, MCS te hian vawiin chawhnu 2:30 khan MSSC Office, Upper Khatlaah charge an inhlan fel a, kum 7 leh thla 10 Secretary hna a chelh hnuah Pu C.Laltlanthanga hi voluntary pension-a chawlin kum thum chhung (term 1) atan Pu John Tanpuia, MCS hian Secretary hna a thawk chhunzawm ve dawn a ni.