24 Jan 2020 06:21

inkhel

MSSC-in​ North East Zone Boxing medalist te lawmpuina hun hmang

 BFI North East Zone Boxing Championship 2020-ah Mizoram chuan gold 4, silver 2 leh bronze 3 dawngin MSSC chuan an pual hian a lawmpuina hun January ni 24, Zirtawpni chawhma dar 11:00 khan a buatsaih.

He huna khual lian Pu Zothanmawia, MCS, Director, Sports & Youth Services Department chuan. 'Engtik lai mahin Boxing-ah Mizote kan hniam ngai lo. Central sawrkar sports ministry-in state tin game ngaih pawimawh theuh a zawhnaah chuan Mizorama kan No.1 chu Boxing a nih thu kan thlen. Chuvangin Olympic kan thlir a, hmarchhak huap mai ni lo, India leh Asia bakah Olympic a medal lak ngei kan duh a ni" a ti.

Sports Director chuan, " Boxer Zoramthanga leh Jenny Lalremliani ten Mizo mai ni lo India an tihmingtha em em a, a hnuah pawh boxer tha tak kan nei chho ta reng a. Boxing hi Mizote game dik takah kan ngai mek tawh a ni. Tun hnaia khelh India ram huap Khelo India ah erawh kan chetha tawk lova, chuvangin kan tan mar tlat reng a ngai' tiin, ' Player te kan vannei em em tawh a, sawrkarin kan mamawh min pek thin avangin tam tak erawh kan zuau phah a, mahni nasa taka kan insenso hian result tha kan neih thei zawk ang. Chhawr tlak leh chhuan tlak ni turin kum tluanin engtik lai pawh championship hmachhawn thei reng tura inbuatsaih hi player thate tih tur a ni. Hlawhtling tur chuan chhungkua pawh kan tan tlan a ngai" a ti bawk.

January ni 3-6, 2020 chhung khan New Bongaigaon, Assam ah India hmarchhak huap boxing championship hi neih a ni a, Mizoram tan Zochhuanawma chuan 69kg ah gold dawngin 75kg ah Vanlalawmpuia chuan gold a dawng bawk a, anni bakah hian Vanlalhriatpuii (60kg) leh Abisek Vanlalmawii (64kg) ten gold medal an dawng bawk. Zonunzira (60kg) leh Zomuansanga (64kg) ten silver dangin Hmingthanmawia (49kg), F.Zoramchhana (56kg) leh TC Lalremruati (57kg) ten bronze medal an dawng bawk. Medalist te hian MiZBA president boral ta Dr.Zorammawia pualin an medal te dawnte an hlan.

Mizoram atangin Boxer 10 an fehchhuak a, coach Albert Sangzuala leh manager T.Lalthlengliana ten an hruai a. India hmarchhak state atangin Mizoram, Manipur, Assam, Arunachal, Nagaland leh Meghalaya te telin Tripura leh Sikkim an tel lo.

(adsbygoogle = window.adsbygoogle || []).push({});