February ni 27, Nilaini chawhma dar 11:00 khan Infiammite inpui, Mizoram State Sports Council Office, Upper Khatlaah tun hnaia neih zawh tak - Federation Cup Powerlifting Championship 2018-19, Kolkata (W. Bengal) leh East India & North East India Powerlifting Championship, Silchar, Assam-a Mizoram team hlawhtlinna lawm a ni.

January ni 31 atanga February ni 3, 2019 chhung khan Kolkata-ah Federation Cup Powerlifting Championship neih a ni a, P. Lalchamliana chuan 120 Kgs category-ah bronze medal a dawng a, East Zone-ah Mizoram team chuan medal 9 dawngin Joseph Lalnunmawia (93Kgs) leh Abraham Lalthakima (105 Kgs)-ten gold medal dawng ve ve a, Abraham Lalthakima, Tlangnuam chu best lifter-ah thlan a ni nghe. Mizoram team hi inelna pahnih - North East leh East India-ahte team champion an ni.

Lalthangmawia (66 Kgs) chuan East India-ah silver dawngin North East-ah Gold medal a dawng a, Ramfanmawia chuan East India-ah Silver dawngin North East-ah gold medal a dawng bawk. Ngurthanzaua Sailo (120 Kg) chuan East India-ah silver dawngin North East-ah gold medal a dawng a, Eliza Malsawmtluanga (93kg) chuan East India leh North East-ahte silver ve ve dawngin Vanlalchhuanga (105 kg) chuan East India-ah Bronze a dawng a, North East-ah silver a dawng bawk. Lalhmangaihsanga (105 kg) chuan East India-ah Bronze a dawng a, North East-ah silver a dawng bawk a, F. Lalmawipuia (93Kgs) chuan East India leh North East-ah bronze medal ve ve dawngin David Lalrinchhana (73Kg) chuan North East-ah bronze medal a dawng ve bawk a ni.

Mizoram Powerlifting team lawmpuina huna khual lian F. Lalthuamluaia, Addl. Secretary, Sports & Youth Services Department chuan, "Mizote hian michak kan ngaisang em em thin a, Mizo thawnthu tam ber luahtu pawh michakte chanchin a ni. Vawiinah chak inelna, East India leh hmarchhak huapa medal la pha lawmpuina hun kan hmang thei hi a ropui em em a ni" a ti.

Pu F. Lalthuamluaia chuan, " Mizoten sports lamah hma kan sawn nasa em em a, kan hnam min chawimawia min chawikangtu pawh sports a ni mek. Sports hi Industry lian takah kan siam thei ang tih ka ngaihtuah reng thin a, kan hlawhtling thei a nih chuan Mizoram tan pawh thil tha tak a ni ang. Hlawhtling tur chuan thawhrimna leh taimakna a ngai a, chu chu a Pathian thu em em a ni. Pathian kan hnaih a, a thupek kan zawm phawt chuan kan ram mai ni lo, mi rama thil tha thlengin kan eiin kan in ang a, hlawhtlinna tlangsangah kan lawnchhuak ngei ang" tiin Mizo powerlifterte an kal zelna turah duhsakna a hlan.

Mizoram Powerlifting team lawmpuina hun hi Pu James Lalramnghaka, AE chuan a kaihruai a, player tin leh team official te hnenah lawmpuina thilpek hlan an ni.

Nimin thawhlehni khan 5th RSC National Karate Kobudo Championship 2019-a Mizoram tana medal late lawmpuina hun MSSC Office-ah hman a ni bawk a, he championship hi Regional Centre, Kadavanthara, Ernakulam Kerala-ah February ni 16–17, 2019 chhungin neih a ni a, Mizoram team hian gold medal 9, silver medal 6 leh bronze 2 an la ve bawk a ni.