February ni 2-7, 2020 khan 72nd Mens & 35th Womens Senior National Weighlifting Championship 2020 chu Kolkata, West Bengal-ah neih a ni a, Mizo ritchawichak Jeremy Lalrinnunga leh Lalchhanhimi ten an chawina huang ve veah gold medal lain India ram champion an ni.
February ni 18-19, 2020 chhungin Bhubaneswar, Odisha-ah 10th Eastern India Body Building championship neih a ni bawk a, Mizoram aiawha tel Parchuailovi Hmar chuan Womens Physic Sports-ah silver medal a dawng bawk. Heng mi pathumte pual hian Mizoram State Sports Council chuan a tih thin danin March ni 4, Nilaini chawhma dar 11:00 khan infiammite inpui, MSSC Office, Upper Khatla-ah lawmpuina hun a hmang.
February ni 2-7, 2020 chhunga neih India ram huap rit inchawisiakna lian ber pakhatah Jeremy Lalrinnunga, Govt.Complex leh Lalchhanhimi, Khawzawl ten gold medal an dawng ve ve a, India chhuanvawr, 2020 Olympic-a tel tura beisei mek Jeremy hian 67 kg huang - Snatch-ah 132kg, clean & jerk-ah 167kg, a vaiin 299kg a chawi a, India ram record thar siamin best lifter-ah thlan a ni nghe nghe.
Chhanhimi pawhin 71kg inelna huang - Snatch-ah 96kg, clean & jerk-ah 122kg, a vaiin 217kg a chawi ve bawk a, national record thar siamin gold medal a dawng.
Medal la phak lo mahse Lalzuidika leh TBC Lalchhanhima te chuan an chawina category-ah October 24 atanga November 4, 2020 chhunga National Games, Goa-a neih turah an qualify a, Jeremy leh Chhanhimite nen Mizo ritchawichak 4 National Games-ah kan hmu dawn. Mizo wrightlifter 4 bakah hian Nagaland hminga khel Jacob Vanlaltluanga chu National Games khel turin a qualify bawk a ni.
Eastern India Body Building-ah pawh Mizo nulate an duai lo hle a, Parchuailovi Hmar, Aizawl Venglai chuan silver dawngin heng Mizoram tihmingthatu pathumte puala hun hmannaa khual lian Pu C.Laltlanthanga, Secretary, MSSC chuan, ' Sports mite tan chauh fitness hi a pawimawh lova, mitin mamawh a ni. Chuvangin indoor gym chauh ni lo, a duh leh mamawh a piang tana hman theih turin Aizawl hmun remchangah outdoor gym siam kan tum" a ti.
'Hlawhtling turin player theihna piah lamah Coach, Association leh sawrkar te tha taka kan thawhho a ngai a, hei hi a kalfuh chuan sang takah kan thleng thei reng a ni.
Sang zawk leh result tha zawk kan neih theih nan Federation lamah thunei phak kan neih ve hi a pawimawh a, khawvel huap thleng pawha nihna nei phak, official leh referee thlenga nei phak player te chu an huai phahin an chetthat phah em em zel a ni" a ti.
Coronavirus vangin khawvelin harsatna tawk mek mahse kum 2020 hian ruahman hunah Olympic Games nei thei turah in ngai ila, Mizo infiammi hmel hmuh ngei kan chak takzet a ni. Kum tawp lamah National Games, Goa ah nghah a ni dawn bawk a, Mizoram atanga qualify kan la neih mang loh laiin Weightlifting ah mi 4 lai mai an qualify der tawh hi a lawmawm takzet a ni" tiin an kal zelna turah duhsakna a hlan.
Mizoram weightlifting coach Malsawma Khiangte chuan Senior National Championship ah Mizo ritchawichak Mipa 4 leh Hmeichhia 2 a hruai thu sawiin Inter state inelna nen Mizoten gold 2 leh bronze 1 an dawn thu a sawi.
Mizoram Bodybuilding team hruaitu manager Zomuanpuia Bawihtlung chuan hun a chawpchilh avang leh inbuatsaihna hun a bichilh avangin intihsiaknaah harsatna an tawh thu a sawi a, result tha zawk nei tura theihtawp an chhuah zui nghal thu a sawi. Mizoram aiawhin player leh official an vaiin 10 an kal.
Mizoram tana medal latute lawmpuina hun hi Pu Rosangliana, Administrative Officer chuan a kaihruai a, a tih thin danin player leh official te hnenah MSSC chuan lawmpuina thilpek a hlan leh theuh a ni.
(adsbygoogle = window.adsbygoogle || []).push({});